Урысыем ижурналистхэм я Союз ишъолъыр къутамэ ТIэшъу Светланэ пащэ фашIыгъ. Ащ фэгъэхьыгъагъ тыгъуасэ зэхэсыгъоу щыIагъэр.

Iофтхьабзэм ипэублэ илъэс пчъагъэрэ мы IэнатIэм Iутыгъэ Бзэджэжъыкъо Абрек къэзэрэугъоигъэхэм шIуфэс къарихыгъ, ипшъэрылъхэр зэригъэцэкIагъэм къытегущыIагъ ыкIи шъолъыр журналистикэм хэхъоныгъэхэр ышIынхэмкIэ Светланэ иIахьышIу зэрэхилъхьащтым ицыхьэ зэрэтелъыр къыхигъэщыгъ.
Лъэпкъ журналистикэм зы­фэз­гъэзэрэ ныбжьыкIэхэм япчъагъэ нахь макIэ зэрэхъурэр гу­мэ­кIыгъо шъхьаIэу зэрэщытыр Iофтхьабзэм къыщыхагъэщыгъ ыкIи ар дэгъэзыжьыгъэныр пшъэрылъэу Союзым зыфигъэу­цужьыгъ. Джащ фэдэу журналистхэр социальнэу къэухъу­мэгъэнхэм нахь игъэкIотыгъэу Iоф дэшIэгъэн зэрэфаер ТIэшъу Светланэ къыIуагъ.
Журналистым имэхьанэ къэ­Iэтыгъэныр, ныдэлъфыбзэкIэ тхэрэ журналистхэм япчъагъэ хэгъэхъогъэныр ары апэрэ пшъэ­рылъэу ТIэшъу Светланэ зыфигъэуцужьыгъэр. Ащ къыдыхэлъытагъэу «Лъэпкъ журналистикэм иеджапI» зыфиIорэ проектыр ыгъэхьазырыгъ. Грант къыдихыным, ащ ишIуагъэкIэ адыгабзэкIэ лэжьэрэ журналистхэм япчъагъэ хэхъоным зэрэщыгугъырэр къыIуагъ. Гу­хэлъы­шIухэр пэщакIэм иIэх, федеральнэ грантхэм якъы­дэхыни ахэлэжьэнэу пшъэрылъ зыфегъэуцужьы.
— СищыIэныгъэ гъогу зэс­пхыгъэ сэнэхьатым неущрэ ма­фэ иIэнэу сыфай. Журналистикэм къырыкIощтым сегъэгумэкIы. Союзым иапэрэ пшъэ­рылъыр журналистхэм ягумэкIыгъохэр дигъэзыжьынхэр, сыд фэдэрэ лъэныкъокIи акъоуцоныр ары. Зисэнэхьат хэшIыкI ин фызиIэ журналистхэр тиIэх, ау уахътэр макIо, ахэр зэблэзы­хъущт ныбжьыкIэхэр тищыкIагъэх, ахэр гъэсэгъэнхэм, ящыкIэгъэ пстэур ягъэгъотыгъэным афэгъэхьыгъ сиапэрэ проект, зэ­фэ­хьысыжьхэм тяжэ, — къы­Iуагъ Светланэ.
АдыгабзэкIэ Iоф зышIэрэ журналистхэр зыщылэжьэхэрэ Къэралыгъо телерадиокомпа­ниеу «Адыгеимрэ» лъэпкъ гъэзетэу «Адыгэ макъэмрэ» Союзым IэпыIэгъу къыфэхъунхэу ащэгугъы.
ДЕЛЭКЪО Анет.