Адыгэ Республикэм и ЛIышъхьэрэ министрэхэм я Каби­нетрэ я Администрацие ыкIи Мыекъопэ район администрациер игъусэхэу Мыекъопэ къэзэкъ отделым ныбжьыкIэ къэзэкъхэм яфестиваль апэрэу Дахъо гъэхъунэм щырагъэкIо­кIыгъ.

Къэзэкъхэм якультурнэ кIэн къэухъу­мэгъэнымкIэ мэхьанэшхо зиIэ Iофтхьабзэм Адыгэ Республикэм ыкIи Краснодар краим ялIыкIо 600 фэдиз хэлэ­жьагъ.
Адыгеим щыриIэгъэ IофшIэгъу зэIукIэгъум хахьэу фестивалым еблэгъагъ Урысые Федерацием зыкъэухъумэжьынымкIэ и Министерствэ и Генеральнэ штаб икомиссие ипащэу, УФ-м и УIэшыгъэ КIуачIэхэм я Генеральнэ штаб и ЗэхэщэкIо-мобилизационнэ гъэIоры­шIэпIэ шъхьаIэ ипащэ игуадзэу, вице-адмиралэу Владимир Цимлянскэр.

Мыекъопэ къэзэкъ отделым иатаманэу Сергей Захаровым хьакIэхэм шIуфэс гущыIэхэмкIэ закъыфигъэзагъ. НыбжьыкIэхэр яIэпэIэсэныгъэкIэ зэхъожьынхэм фэшI мыщ фэдэ Iофтхьабзэхэм мэхьанэшхо зэряIэр ащ къыхигъэщыгъ.
Фестивалыр лъэныкъо зэфэшъхьаф­хэмкIэ гъэшIэгъонэу рекIокIыгъ. Мыщ хэлэжьагъэхэм спорт лъэпкъ зэфэшъхьафхэмкIэ заушэтын амал яIагъ. Антон Деминым къызэриIуагъэмкIэ,
мыщ фэдэ Iофтхьабзэхэм яшIуагъэкIэ къэзэкъхэм яшэн-хабзэхэр аухъумэх, джащ фэдэу ныбжьыкIэхэр бэу зэращалIэх.

Фестивалыр анахь гъэшIэгъон къэзышIыгъэр къэзэкъхэр шыхэм атесхэу къулэе шIыкIэхэр къызэрагъэлъэгъуа­гъэхэр ары. Ащ нэмыкIэу къэзэкъхэм агъэфедэрэ пкъыгъохэу пхъэм ыкIи шъом ахэшIыкIыгъэхэм Iофтхьабзэм хэлэжьагъэхэм защагъэгъозагъ. Нэужым Джэджэ районым икъэзэкъ обществэ хэтхэм аупщэрыхьыгъэ шхыныгъо зэфэшъхьаф­хэр хьакIэхэм арагъэуплъэкIугъэх.
Фестивалым икIэух мыщ хэлэжьа­гъэхэм шIухьафтынхэр афашIыгъэх. Мые­къопэ къэзэкъ отделым иатаман игуадзэу Анастасия Нетребинам къызэриIуагъэмкIэ, мы фестивалыр апэрэу зэхащагъ нахь мышIэми, цIыфыбэ, ана­хьэу ныбжьыкIэхэр, зэрищэлIагъ. ТапэкIи мыщ фэдэ Iофтхьабзэхэр зэрэлъагъэ­кIотэщтхэр къыхигъэщыгъ.
Якультурнэ кIэн къэухъумэгъэным ыкIи зыкIыныгъэ ахэлъэу пIугъэнхэм фэIорышIэрэ къэзэкъ ныбжьыкIэхэм яапэрэ фестиваль гум къинэжьэу кIуагъэ. Къэзэкъ обществэхэм азыфагу илъ зэпхыныгъэр гъэпытагъэ зэрэхъугъэм дакIоу ахэм яшэнхабзэхэр къэухъумэгъэнхэм ыкIи зэрагъэшIэнхэм ныбжьыкIэхэм мэхьанэшхо ратыгъ.
Анастасия Нетребинар.
Сурэтхэр: Е. Литовко.