Фондэу «Хэгъэгум иухъумакIо­хэр» зыфиIорэм ишъолъыр ­къутамэ ипроект хахьэу, АР-м и Лъэпкъ ыкIи НыбжьыкIэ тхылъеджапIэхэр ягъусэхэу тарихъым фэгъэхьыгъэ джэгун-зэнэкъокъу шъуашэм илъ Iофтхьабзэу «Герои-Победители» зыфиIорэр рагъэкIо­кIыгъ.

Iофтхьабзэм къырагъэблэгъагъэх ветеранхэр ыкIи Адыгэ къэралыгъо университетым тарихъымкIэ ифакультет истудентхэр. Зэнэкъокъум командитIу хэлэжьагъ: Мыекъопэ гурыт еджапIэу N 10-м и «Феникс» ыкIи республикэ гимназием икупэу «ТекIоныгъ» зыцIэхэр.
Мызыгъэгум Iофтхьабзэм хэлэжьэрэ кIэлэеджакIохэм апае зэхэщакIохэм упчIэ ыкIи IофшIэн гъэшIэгъонхэр афагъэхьазырыгъэх. Зэнэкъокъур Хэгъэгу зэошхом ТекIоныгъэ къызыщыдахыгъэр илъэс 80 зэрэхъурэм, джащ фэдэу мы мафэхэм типыйхэм апэуцужьхэзэ лIы­хъужъныгъэ зезыхьагъэхэм афэгъэхьыгъагъ. Тарихъ хъугъэ-шIагъэхэм хэшIыкIэу афыряIэр къэгъэлъэгъогъэным имызакъоу, кIэлэцIыкIухэр командэм хэтхэу къэбархэм яшъыпкъапIэ охътэ кIэкIым зэхафын, ащ нэмыкIэу заом фэгъэхьыгъэ орэдхэр къашIэнхэ фэягъ.
Командэ пэпчъ шIэныгъэ икъу IэкIэ­лъэу, гулъытэ иIэу текIоныгъэм икъыдэхын фэбэнагъ. Арэу щытми, «Фениксыр» апэ ишъыгъ ыкIи текIоныгъэм и Кубок къыдихыгъ. Командэу «ТекIоныгъ» зыфиIорэр ыуж къинагъ нахь мышIэми, кIэлэеджакIохэм шIэныгъэ дэгъухэр къагъэлъэгъуагъ. Мы Iоф­тхьабзэм хэлэжьэгъэ кIэлэеджакIохэм щытхъу тхылъхэр ыкIи шIухьафтынхэр аратыгъэх.
— ГъэрекIо фондэу «Хэгъэгум иухъу­макIохэр» зыфиIорэм ишъолъыр къутамэ проектэу «Герои-Победители» зыфиIорэм кIэщакIо фэхъугъ. Мыр тарихъ мэхьанэ зиIэ джэгун-зэнэкъокъоу щыт. Мыщ фэдэ узыгъэгъозэрэ проектхэр кIэлэцIыкIухэм ашIогъэ­шIэгъоных, ахэм яшIуагъэкIэ нахьыбэу еджэх ыкIи яшIэныгъэхэм ахагъахъо. Мы зэнэ­къокъур Хэгъэгу зэошхом Те­кIоныгъэр къызыдахыгъэр илъэс 80 зэрэхъурэм фэдгъэхьыгъ. Ащ нэмыкIэу, хэушъхьафыкIыгъэ дзэ операцием епхыгъэ уп­чIэхэри зэнэкъокъум хэдгъэхьагъэх. КомандитIуми дэгъоу загъэхьазырыгъ. ТекIоныгъэр къыдэзыхыгъэ командэр тапэкIэ Адыгэ къэралыгъо универси­тетым тарихъымкIэ ифакультет истудентхэм янэкъокъущт, — къыIуагъ фондым икъутамэ ипащэ игуадзэу Елена Малковам.

НэкIубгъор зыгъэхьазырыгъэр
КIАРЭ Фатим.