Адыгэ Республикэм и ЛIышъхьэу КъумпIыл Мурат IофшIэгъу зэIу­кIэгъу дыриIагъ АР-м псэушъхьэхэмрэ псы къэкIуапIэхэмрэ къэухъу­мэгъэнхэмкIэ ыкIи гъэфедэгъэнхэмкIэ и ГъэIорышIапIэ ипащэу Аслан Стрикачевым.

ШэкIонымрэ пцэжъыеешэнымрэ алъэныкъокIэ хэбзэгъэу­цугъэу щыIэр укъуагъэ мыхъунымкIэ уплъэкIун-лъыплъэн Iоф­тхьабзэхэм япхыгъэ Iофы­гъохэм ахэр атегущыIагъэх.
Адыгеим и ЛIышъхьэ къыхигъэщыгъ чIыопс къэкIуапIэхэр къэухъумэгъэнхэм ыкIи ащкIэ хэбзэгъэуцугъэу щыIэр зыу­къохэрэм апэуцужьыгъэным мэхьанэшхо зэряIэр. Ащ къызэриIуагъэмкIэ, тыкъэзыуцу­хьэрэ дунаир щынэгъончъэу щытынымкIи, зыпкъитыныгъэ хэлъэу республикэм хэхъоны-
гъэ ышIынымкIи ахэр пшъэрылъ шъхьаIэх.
ГъэIорышIапIэм ипащэ къыIотагъ илъэсэу икIыгъэм Iофэу ашIагъэр ыкIи псэушъхьэхэр къэухъумэгъэнхэмкIэ, шэкIонымкIэ шапхъэу щыIэхэр укъуагъэ мыхъунхэмкIэ непэ агъэцакIэ­хэрэми къатегущыIагъ. ГущыIэм пае, 2024-рэ илъэсым шэкIонымкIэ хэбзэгъэуцугъэу щыIэр гъогогъуи 154-рэ аукъуагъэу шэкIоным фэгъэзэгъэ инспекторхэм къыхагъэщыгъ.
А. Стрикачевым къызэриIуа­гъэмкIэ, джырэ лъэхъаным шэ­кIон фитыгохэп. Зэхэубытагъэу къэпIон хъумэ, республикэм ичIыпIэ гъэнэфагъэхэу псэу­шъхьэхэр зыщаIыгъхэм яIофхэм язытет уигъэрэзэнэу щыт. Гъэ­IорышIапIэм иIофышIэхэм мафэ къэс ауплъэкIух зыщышэкIохэрэ чIыпIэхэм язытет зыфэдэр.
Ащ фэдэ чIыпIэхэм гектар мин 593,3-рэ фэдиз аубыты. Уплъэ­кIун IофшIэнхэр агъэцакIэхэ зыхъукIэ ахэм гъусэ зыфашIых шэкIоныр зыщафадэрэ чIыпIэхэм ялIыкIохэр. Ахэм шэпхъэ гъэнэфагъэу щыIэхэр, цIыфхэм япсауныгъэ зэрар рахы зэрэмыхъущтым имызакъоу, ежь псэушъхьэхэми, чIыпIэу ахэр зыдэщыIэми язытет тэрэзынымкIэ пшъэрылъхэр зыфэдэхэр агу къагъэкIыжьых.
Ащ нэмыкIэу псыхэм ахэсхэр, ахъухэрэр хэбзэнчъэу къыхамыдзынхэм пае, пцэжъыехъунымкIэ Федеральнэ агентствэм и Азовэ-Черноморскэ чIыпIэ гъэIорышIапIэ ягъусэу Iофтхьабзэу зэрахьащтхэм яплан зэхагъэуцуагъ. Мы лъэхъаным ащ щылажьэхэрэм анаIэ анахьэу зытетыр пцэжъыехэм икрар зыщагъэтIылъырэ лъэхъаным хэбзэгъэуцугъэр зыукъохэрэр къыхэгъэщыгъэнхэр ары. Краснодар псыIыгъыпIэм иIэгъо-­блэгъу уплъэкIун Iофтхьабзэхэр нахьыбэу зыщызэшIуахы­хэрэр.
КъумпIыл Мурат анахьэу анаIэ зытыраригъэдзагъэр псэу­шъхьэ лъэпкъхэу зипчъагъэкIэ нахь макIэ хъугъэхэм якъэухъу­мэн гъэлъэшыгъэн зэрэфаер ары. УплъэкIокIо къулыкъухэм ямызакъоу, ГъэIорышIапIэм ащ­кIэ гъусэ къызфишIын фае об­щественнэ организациехэри.
ИкIэухым республикэм и ЛIышъхьэ къыхигъэщыгъ псэу­шъхьэ лъэпкъ зэфэшъхьафхэр къэухъумэгъэнхэм мэхьанэшхо зэриIэр ыкIи пшъэрылъ афи­шIыгъ уплъэкIун Iофтхьабзэхэр агъэлъэшынхэу, хэбзэгъэуцугъэу щыIэр зыукъохэрэм яфэшъошэ пшъэдэкIыжь арагъэ­хьынэу.
«КъыткIэхъухьэхэрэм апае Адыгеим ичIыопс дэхэ дэдэр къэухъумэгъэнымкIэ яшIуагъэ къэкIощт хэбзэгъэуцугъэр ямыгъэукъогъэнымрэ Iофтхьабзэхэм шIуагъэ къягъэтыгъэным­рэ», — къыкIигъэтхъыгъ Къум­пIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.