Хэгъэгу зэошхом ТекIоныгъэр къыз­щыдахыгъэр илъэс 80 зыщыхъурэм ипэгъокIэу ветеранхэм шъолъыр бюджетым къыхэхыгъэ зэтыгъо ахъ­щэ тынхэр афатIупщыгъэх.

Заом хэлэжьагъэхэм ыкIи сэкъатныгъэ хэзыхыгъэхэм, Ленинград блокадэм, концлагерьхэм адэсыгъэхэу а лъэхъаным зыныбжь имыкъугъагъэхэм сомэ мини 100 зырыз, заом хэлэжьагъэхэм яшъхьэгъусэхэм ыкIи зэо кIыбым щыIагъэхэм сомэ мин 25-рэ зырыз афатIупщыгъ.
РеспубликэмкIэ ащ фэдэ ахъщэ тынхэр зыIукIэщтхэр нэбгырэ 667-рэ мэхъу, ахэм ащыщэу заом хэлэжьагъэхэр е ахэм арагъапшэхэрэр нэбгырэ 66-рэ мэхъу.
Ащ нэмыкIэу а нэбгырэ 66-мэ Шъэумэн Хьазрэт ыцIэ зыхьырэ Фондым имылъку къыхэкIэу сомэ мини 100 зырыз аратыгъах.
— ТекIоныгъэр къытфыдэзыхи, мамыр щыIакIэ тэзгъэгъотыжьыгъэ тиветеранхэм тынаIэ атедгъэтыным, тафэгумэкIыным мэхьанэшхо иI. Джащ фэд зэоуж илъэсхэм хэгъэгур зэтезгъэуцожьыгъэ пстэуми тафэраз. Непэ типшъэрылъ шъхьаIэр тарихъ шIэжьыр къэтыухъумэныр, фашизмэм текIогъэнымкIэ Урысыем мэхьанэу иIагъэм ехьылIэгъэ къэбар шъыпкъэр къыткIэхъухьэрэ лIэужхэм алъы­гъэIэсыныр, ныбжьыкIэхэм яхэгъэгу шIу алъэгъоу пIу­гъэнхэр ары, — къыIуагъ АР-м и ЛIышъхьэу КъумпIыл Мурат.