«ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ федеральнэ проектэу Iэрыфэгъу къэлэ щыIакIэ гъэпсы­гъэным фэгъэхьыгъэм къыдыхэлъытагъэу псэу­пIэхэм яобщест­веннэ чIыпIэу зэтыра­гъэпсыхьащтхэр къыха­хынхэу зэхащэгъэ мэкъэтынхэр лъагъэ­кIуатэх.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, мэлылъфэгъум и 21-у ар зыщырагъэжьагъэм ыуж апэрэ тхьамафэм тишъолъыр щыпсэурэ нэбгырэ мини 7-м ехъумэ ама­къэхэр атыгъэх.
Шъугу къэдгъэкIыжьын, Урысыем ишъолъырхэм зэкIэми онлайн шIыкIэм тетэу ар ащэкIо. Нэбгырэ мин 20-м къыщымыкIэу зыдэсхэр ары ащ хэлажьэхэрэр. АдыгеимкIэ къалэу Мыекъуапэ, поселкэхэу Инэм, Яблоновскэр ары чIыпIэу гъэкIэжьын зищыкIагъэхэр къызщыхахыгъэхэр.
Адыгеим икъэлэ шъхьаIэ ща­шIырэ чылысэу Успение Пресвятой богородицы къыпэIулъ чIыпIэр, Хэгъэгу зэошхом хэкIо­дагъэхэм ясаугъэт зэхэт къызэлъиубытырэр ыкIи къалэм иура­мэу Шоссейннэм тет скверыр зэнэкъокъум хагъэлэжьэнхэу къырагъэуцуагъэх.
Къэлэ гъэпсыкIэ зиIэ Инэм псэупIэ коимкIэ къутырэу Супов­скэмрэ къуаджэу БжыхьэкъоякIэмрэ якIэлэцIыкIу джэгупIэхэм цIыфхэм амакъэхэр афатыщтых.
Поселкэу Яблоновскэм иурам­хэу Космическэмрэ Краснодарскэмрэ атет спорт площадкэхэр, зэпстэумкIи щы мэхъух, ары хагъэлэжьэнэу къыхахыгъэхэр.
Мэкъэтынхэр мэкъуогъум и 12-м нэс кIощтых. ШIоигъоныгъэ зиIэхэр мы ссылкэмкIэ хэлэжьэнхэ алъэкIыщт: zagorodsreda.gosuslugi.ru.