Чернобыль атомнэ электростанцием къыщыхъугъэ тхьамыкIагъом идэгъэзыжьын хэлэ­жьагъэхэм ясаугъэтэу Мые­къуа­пэ дэтым зэхахьэ щы­кIуагъ.

Зыми емыгъэпшэшъущт ядернэ тхьамыкIагъор къызыхъугъэр илъэс 39-рэ зэрэхъугъэм ар фэгъэхьыгъагъ.
Ащ хэлэжьагъэх АР-м иминистрэхэм я Кабинет хэтхэр, къэралыгъо хабзэм икъулыкъухэм, общественнэ организациехэм ялIыкIохэр, депутатхэр, тхьамыкIагъохэм ядэгъэзыжьын хэлэжьагъэхэр, ахэм яIахьылхэр, ныбжьыкIэхэр, кIэлэ­еджакIохэр.
Адыгэ Республикэм IофшIэнымкIэ ыкIи социальнэ хэхъоныгъэмкIэ иминист­рэу Мырзэ Джанбэч ипсалъэ къызэрэщы­хигъэщыгъэмкIэ, лIыхъужъ-дэгъэзыжьа­кIохэм Адыгеим икIыгъэ нэбгыришъэ пчъагъэ ахэтыгъ, ау, гухэкI нахь мышIэми, псаоу къытхэтыжьыр нэбгырэ 449-рэ.
— Адыгеим и ЛIышъхьэу КъумпIыл Мурат ыцIэкIи, сэ сшъхьэкIи радиацием идэгъэзыжьын хэлэжьагъэхэу щымыIэжьхэм шъхьащэ афэтшIызэ, псаоу къэнагъэхэми лъытэныгъэ зэрафэтшIырэр ятэIо. Мы купым хахьэхэрэм ящыкIэгъэ фэгъэкIотэнхэр, социальнэ ыкIи медицинэ IэпыIэгъур зэрафагъэцакIэхэрэм республикэм ипащэ ынаIэ тырегъэты. Ыпэрэ илъэсхэм афэдэу радиацием къыздихьыгъэ тхьамыкIагъом якIэуххэм ядэгъэзыжьын хэлэжьагъэхэм ямафэ ипэгъокIэу дэгъэзыжьакIохэм, щымыIэжьхэм яунагъохэми ахъщэ IэпыIэгъу афа­тIупщыгъ. Джащ фэдэу къэралыгъо хэбзэ къулыкъухэм чернобыльцэхэм яобщественнэ организациехэм зэпхыны-
гъэ адыряI, ящыкIэгъэ IэпыIэгъур арагъэгъотыным, ягукъэкIхэм адырагъэштэным фэхьазырых, — хигъэунэфыкIыгъ Мырзэ Джанбэч.
АР-м и Къэралыгъо Совет — Хасэм икомитет ипащэу, радиацием къызди­хьыгъэ тхьамыкIагъохэм ядэгъэзэжьын хэлэжьагъэу Евгений Саловыр мыщ фэгъэхьыгъэу къэгущыIагъ.
— Атомнэ тхьамыкIагъом идэгъэзыжьын пстэумкIи нэбгырэ мин 450-рэ хэлэжьагъ, ахэм ащыщэу 720-р Адыгеим икIыгъэх. Непэ типшъэрылъыр ахэм ацIэхэр тарихъым къыхэнэныр ыкIи тщымыгъупшэнхэр ары, — къыIуагъ Евгений Саловым.
Зэхахьэм икIэух зидунай зыхъожьыгъэхэм яшIэжь агъэлъапIэзэ къэзэрэугъоигъэхэр зы такъикърэ афэшъыгъуагъэх, саугъэтым къэгъагъэхэр кIэралъхьагъэх.
Iэшъынэ Сусан.