Зэнэкъокъухэу «Адыгеим ипэщэ анахь дэгъу», «Адыгеим икIэлэ­егъэджэ анахь дэгъу», «Адыгеим икIэлэпIу анахь дэгъу», «2025-рэ илъэсым Адыгеим ­ипедагог-психолог», «Адыгеим икIэлэегъэджэ дефектолог», «Сыгу кIэлэцIыкIухэм ясэты» зыфиIохэрэр мы мафэхэм Мые­къуапэ щыкIуагъэх.

Лъэныкъо пэпчъ анахь дэгъоу зы­къыщызыгъэлъэгъуагъэхэр ыкIи лауреат хъугъэхэр аужырэ уцугъом хэлэжьагъэх.
Зэнэкъокъухэм яфедеральнэ уцугъо гъэрекIо къыщегъэжьагъэу «Брифингым» хэт хъугъэ, ащ къыпкъырыкIыхэзэ рес­публикэми мыщ фэдэ шIыкIэ къыхагъэ­хьагъ. Едзыгъохэм анахь шIэныгъэ куу къащызыгъэлъэгъуагъэхэм упчIэ зэфэшъхьафхэм джэуапхэр къазэрэраты­жьыхэрэм уасэ афашIыгъ. КIэлэегъаджэм ипшъэрылъ шъхьаIэхэр, ны-тыхэм Iоф зэрадишIэрэр, пэублэ еджапIэм шIэныгъэу къаритырэр, гухэлъэу яIэхэр ыкIи нэмыкIхэм ахэр афэгъэхьыгъагъэх.
Анахь дэгъоу зыкъэзыгъэлъэгъуагъэ­хэм текIоныгъэр афагъэшъошэщт, ахэр федеральнэ уцугъом хэлэжьэщтых.
ДЕЛЭКЪО Анет.