Шъолъырым имэкъумэщ хъыз­мэт хэхъоныгъэхэр езыгъэшIын зылъэкIыщт Iофтхьабзэхэр Мыекъопэ къэралыгъо технологическэ университетым щыкIуагъэх.

ЫпэрапшIэу «Фермерхэм яеджапI. Непэрэ технологиехэр фермер хъызмэт­шIапIэм зэращыбгъэфедэщтхэр» зыфи­Iорэр щатIупщыгъ.
Мыекъопэ къэралыгъо технологическэ университетым, Iахьзэхэлъ обществэу «Россельхозбанкымрэ» Адыгэ Респуб­ликэм мэкъу-мэщымкIэ и Министерст­вэрэ зэзэгъыныгъэу зэдашIыгъэм къыдыхэлъытагъэу 2019-рэ илъэсым къыщегъэжьагъэу проектыр апшъэрэ еджапIэм щызэхащэ.
Iофтхьабзэм икъызэIухын хэлэжьа­гъэх Адыгэ Республикэм мэкъу-мэщымкIэ иминистрэ игуадзэу Сергей Шопиныр, АР-м ифермерхэм я Союз итхьаматэу Дзэхъохъу Аслъан, предпринимательхэм IэпыIэгъу зыщарагъэгъотырэ гупчэу «Мой бизнес» зыфиIорэм ипащэу КIыкI Артур, Россельхозбанкым иIофышIэу Павел Буханцевыр. Зезыщагъэр мэкъу­мэщ шIэ­ныгъэхэмкIэ докторэу, доцентэу Мамсыр Нурбый.

ЛъэныкъуитIукIэ гощыгъэу егъэджэнхэр зэхащэщтых, мыгъэ нэбгырэ 35-рэ къекIолIэнэу щытыгъ, ау шIоигъоныгъэ зиIэхэр нахьыбэу къычIэкIыгъ, нэбгырэ 44-рэ хэлажьэ. Лекциехэм ямызакъоу республикэм ит хъызмэтшIэпIэ инхэм ахэр ащэщтых. Бизнес-планхэр еджэ­хэ­рэм зэхагъэуцощтых, кIэухым зэреджа­гъэхэр къэзыушыхьатырэ тхылъхэр ара­тыжьыщтых.
Зэнэкъокъоу «Аграрий» зыфиIорэм иаужырэ уцугъо нэужым къызэIуахыгъ. Гурыт сэнэхьат зэзыгъэгъотырэ студентхэр ащ хэлэжьагъэх. Урысыем ишъо­лъыри 9-мэ яныбжьыкIэхэм япроектхэр мыщ къырахьылIагъэх, Iофтхьабзэм пэIудзыгъэ шIыкIэм тетэу къыхэлэжьэнхэ амал яIагъ.
— Илъэс къэс зэнэкъокъум хэла­жьэ­хэрэм япчъагъэ хэхъо. Мыгъэ я 6-у ар зэхэтэщэ. Мэкъумэщ хъызмэтым епхыгъэ лъэныкъо анахь гъэшIэгъонхэр ныб­жьыкIэхэм къыхахых. ТекIоныгъэ къы­дэ­зыхыхэрэм тиапшъэрэ еджапIэм къы­чIэхьанхэмкIэ балл тедзэу 10 е 8 къа­фыхагъэхъощт, — къыIуагъ Мамсыр Нурбый.
Зэнэкъокъум иаужырэ уцугъо проект 30 къырахьылIагъ, ахэм мэхьанэу яIэр студентхэм къыраIотыкIыгъ. Экспертн комиссием хэтхэм анахь дэгъоу зыкъэ­зыгъэлъэгъуагъэхэр къыхагъэщыгъэх.
ДЕЛЭКЪО Анет.
Сурэтхэр: МКъТУ-м ипресс-къулыкъу.