Мэлылъфэгъу мазэу икIыгъэм ыкIэм УФ-м ихэбзэихъухьэхэм я Советэу Федеральнэ ЗэIукIэм щызэхащагъэм иIофтхьабзэхэр Санкт-Петербург щыкIуагъэх. Ахэм ахэлэжьагъ АР-м и Къэралыгъо Совет — Хасэм и Тхьаматэу Владимир Нарожнэр.

Зэрэхабзэу, ыпэрапшIэу комиссиехэр зэхэсыгъэх. АР-м и Парламент и Тхьаматэу Владимир Нарожнэр мэкъумэщ-къы­дэгъэкIын политикэмкIэ, чIыопсым игъэфедэнкIэ ыкIи экологиемкIэ комиссиеу зыхэтым иIофшIэн хэлэжьагъ. Мэкъумэщ страхованием, мэзхэр машIом щыухъумэгъэнхэм япхыгъэ Iофхэм атегущыIагъэх.
Адыгеим ишъолъыр Парламент ипащэ пынджлэжьыным изегъэушъомбгъун, ащ пылъхэм IэпыIэгъу ягъэгъотыгъэным, мы лъэныкъомкIэ субсидиехэм ятын афытегъэпсыхьэгъэ федеральнэ программэхэм ягъэкIэжьын фэгъэхьыгъэу къэгущыIагъ. Мэкъумэщ республикэу ежь зилIыкIом ипащэхэм мы лъэныкъом щылажьэхэрэм IэпыIэгъу афэхъугъэныр апшъэ ашIыхэрэм зэращыщым ащ къыкIигъэтхъыгъ, чъыгха­тэхэм, хэтэрыкI къэгъэкIыным, былым­хъуным, анахьэу щэ къэзытыхэрэм, шъолъырым зызэрэщаушъомбгъурэр къыIотагъ.
Пынджлэжьыным къытегущыIэзэ, ащ пылъхэм культурэм икъэгъэкIын ыкIи иIугъэкIын мылъкоу тырагъэкIуадэрэм щыщ субсидиекIэ къафегъэгъэзэжьыгъэным, гъомылапхъэ зыхашIыкIырэ лэжьыгъэр IэкIыбым гъэкIогъэным алъэныкъокIэ кIэщакIо зыфэхъугъэхэм нэIуасэ афишIыгъэх.
— Республикэ Парламентыр мы Iоф­шIэным чанэу хэлажьэ, мэзхэм, псыхэм яэкологическэ системэхэм якъэухъумэн, былымхъуным изегъэушъомбгъун, мэкъу­мэщ хъызмэтым ичIыгухэр шIуагъэ къы­тэу гъэфедэгъэнхэм, нэмыкIхэм афэгъэ­хьыгъэу мызэу, мытIоу ахэм такъыщыгущыIагъ, — къыIуагъ Владимир Нарожнэм зэхэсыгъом ыуж.
УФ-м ФедерациехэмкIэ и Совет и Тхьаматэу Валентина Матвиенкэмрэ Къэралыгъо Думэм и Тхьаматэу Вячеслав Володинымрэ пэщэныгъэр зыдызэрахьэгъэ зэхэсыгъо хэбзэихъухьэхэм я Совет и Президиум нэужым иIагъ. КIэлэцIыкIухэм ягъэмэфэ зыгъэпсэфыгъо уахътэ изэхэщэн, медицинэ IэпыIэгъур нахь къызIэкIэгъэхьэгъошIу цIыфхэм афэшIыгъэным, гъэсэныгъэм ылъэны­къокIэ IофышIэхэр шъолъырхэм икъоу яIэнхэм япхыгъэ Iофхэр ары анахьэу ащ зигугъу щашIыгъэр.
Ащ ыуж УФ-м и Президентэу Владимир Путиныр хэбзэихъухьэхэм я Совет хэтхэм аIукIагъ. Урысыер охътэ къызэрымыкIоу зыхэтым политическэ, общественнэ ыкIи правовой системэхэм шIуагъэ къатэу Iоф зэрашIэрэр, ащ къэ­ралыгъом исуверенитет зэрэпытэр джыри зэ къызэриушыхьатыжьырэр Президентым къыхигъэщыгъ.
— Правительствэми, парламентыми, шъолъыр хэбзэ къулыкъухэми IофшIэныбэ яI, лъэпкъ проектхэм япхырыщыни ахэм ащыщ. Ахэм къадэлъытагъэхэр гъэцэкIагъэ зэрэхъухэрэм шъулъыплъэнэу сышъущэгугъы. ШIагъэ хъугъэу, цIыфхэм ящыIакIэ нахьышIу зышIыгъэр ары ти­IофшIэн къызэрэдгъэлъэгъон фаер нахь, ахъщэу дгъэфедагъэр зыфэдизыр арэп, — къыкIигъэтхъыгъ Владимир Путиным.
ХэушъхьафыкIыгъэ дзэ операцием хэлажьэхэрэм IэпыIэгъу ятыгъэным депутатхэм яIахьышхо зэрэхалъхьэрэр, ахэм ащыщхэр ашъхьэкIэ ащ зэрэхэлажьэхэрэр къэралыгъом ипащэ къыхигъэщыгъ.
Хъут Нэфсэт.
Сурэтыр: АР-м и Къэралыгъо Совет — Хасэр.