Урысыем зыухъумэжьынымкIэ и Министерствэ иагитационнэ мэшIоку Мыекъуапэ къыщыуцугъагъ. Ащ икъэкIогъу тефэу хэкупсэныгъэ Iофтхьабзэу «ШIэжьыр зыкIыныгъэм ылъапс. ЛIыхъужъныгъэр кIуачIэ» зыфиIоу ТекIоныгъэр къыздахыгъэр илъэс 80 зэрэхъурэм фэгъэхьыгъэри къалэм щызэхащагъ.

Iофтхьабзэр Мыекъуапэ имэшIоку уцупIэ ипчэгу щыкIуагъ. МэфэкI зэхахьэм хэлэжьагъэх АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, къалэм ипащэу Геннадий Митрофановыр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, дзэ къулыкъушIэхэр, ныбжьыкIэхэр. АР-м и ЛIышъхьэу Къум­пIыл Мурат ыцIэкIэ Iофтхьабзэм къе­кIолIагъэхэм шIуфэс къарихыгъ Цэй Эдуард:
— Адыгеим сыдигъуи дзэ ухьазырыныгъэ лъэш илъыгъ ыкIи ащ фэдэу къэнэжьы. Дзэ къулыкъум имэхьанэ гъэпытэгъэнымкIэ, ныбжьыкIэхэр хэкупсэхэу пIугъэнхэмкIэ шъолъырым бэ щашIэ. Къэралыгъом зыщищыкIагъэм щынэ амышIэу, апсэ емыблэжьхэу ящыIэныгъэ агъэтIылъыным тичIыгогъу­хэр сыдигъуи фэхьазырых. Хэгъэгу зэошхор окIофэ ащ фэдагъ, тапэкIи ар хъожьыгъэ хъущтэп.

Дзэ мэшIокур мэлылъфэгъум и 19-м гъогу къытехьагъ. Къэралыгъом ишъо­лъыр 61-мэ арыхьащт, псэупIэ 75-мэ адэхьащт. ПстэумкIи километрэ мин 33-рэ ыкIущт.
— Мы IофтхьабзэмкIэ тидзэхэм, тикъэралыгъошхо щыпсэухэрэм языкIыныгъэ къэдгъэлъагъо, тарихъыр зэзыхъо­кIынэу ежьэхэрэм тапэуцужьы тшIоигъу. ХэушъхьафыкIыгъэ дзэ операцием хэлажьэхэрэм ялIыхъужъныгъэ мэшIоку дэкIыгъор фэгъэхьыгъ. Урысыем инепэрэ дзэ иамалхэр къизыIотыкIырэ къэгъэлъэгъон шъхьафхэри мэшIокум щыгъэ­псыгъэх. Джащ фэдэу зэпэуцужьхэм пыйхэм къащытетхыгъэ техникэри къыщыгъэлъэгъуагъ. Хэгъэгу зэошхом илъэ­хъан тидзэкIолIхэм япсэемыблэжьыныгъэ къизыгъэлъэгъукIырэ къэгъэлъэгъон­ри мэшIокум щэлажьэ. Тигъогу Москва щытыублагъ, бэдзэогъум и 3-м ащ щытыухыщт, — къыIуагъ проектым икIэщакIоу, контр-адмиралэу Александр Гринкевич.
МэфэкI Iофтхьабзэм къыдыхэлъытагъэу Мыекъуапэ идзэ Iэтэхъо купхэм дзэ ЛIыхъужъхэм ацIэхэр Александр Гринкевич афигъэшъошагъэх. Къалэм игурыт еджапIэу N 2-м иотрядэу «Десант» зыфиIорэм Урысыем и ЛIыхъу­жъэу Вадим Лемеш ыцIэ ратыгъ. Гурыт еджапIэу N 17-м икуп Урысыем и ЛIыхъужъэу Евгений Осокиным джы ыцIэ ехьы. Къэралыгъом и ЛIыхъужъэу Валерий Заволянскэм ыцIэ фагъэшъошагъ Мыекъуапэ илицееу N 19-м идзэ Iэтэхъо куп. ЕджапIэу N 11-м иныбжьыкIэхэм ЛIыхъужъныгъэм иорден изе­хьакIоу Никита Ткаченкэм ыцIэ фагъэшъошагъ.
МэшIокур Мыекъуапэ зыдэтыгъэ сыхьат заулэм нэбгыришъэ пчъагъэмэ зэрагъэлъэгъугъ. Ащ ыкIоцI щыгъэпсыгъэ къэгъэлъэгъонхэр анахьэу зышIогъэшIэгъоныгъэхэр ныбжьыкIэхэр ары: Iашэхэр зэхахыгъэх, аугъоижьыгъэх, лагъымэхэр къаплъыхьагъэх.
Джащ фэдэу дзэ пщэрыхьапIэр чIыпIэм щылэжьагъ, творческэ купхэми Iоф щашIагъ.

Сурэтхэр: А. Балабась