Мэфэ зэкIэлъыкIохэм зыщагъэпсэфынэу зекIуабэ республикэм къэкIогъагъ. Лъэгъупхъэ чIыпIэу иIэхэм жъугъэу ащызэблэкIыгъэх. Ахэр Волгоград ыкIи Ростов хэкухэм, гъунэгъу Пшызэ шъолъырым, Москва, Смоленскэ, къэралыгъом инэмыкI чIыпIэхэм къарыкIыгъэх.

Джащ фэдэу «Кавказым иналмэс-налкъут» зыфиIорэ зекIо мэшIокум мыгъэрэ лъэхъаныкIэр ыуб­лагъ. Мы илъэсымкIэ апэрэ дэкIыгъохэр иIагъэх. БлэкIыгъэ илъэсхэм афэдэу Мыекъуапи къыщыуцугъ.
Шъугу къэдгъэкIыжьын, зекIо мэшIокум ятфэнэрэ илъэс хъугъэу Iоф ешIэ. Игъогууанэ Адыгеир зыхэтыр яплIэнэрэ илъэс. Москва къыщеублэшъ, Ростов-на-Дону, Мыекъуапэ, Владикавказ, Грознэм, Дербент, Махачкала, Налщык къащэуцу. Шъолъырым илъэгъупхъэ чIыпIэхэм, чIыопсым, тарихъым ыкIи культурэм зы мафэм къыкIоцI зекIохэм нэIуасэ зыфашIы. КIоцI зекIоным зегъэушъомбгъугъэныр ыкIи шъолъырхэм цIыфхэр нахьыбэу къящэлIэгъэнхэр пшъэрылъ шъхьаI.
Мыгъэрэ апэрэ мэшIокум зекIо нэбгыришъэрэ тIокIырэ Адыгеим къыщагъ. Ахэм яшIоигъоныгъэхэм адиштэу программэхэр зэхагъэуцуагъэх. Шъхьадж къыхихыгъэм елъытыгъэу Гъозэрыплъэ, Лэгъонакъэ бгытешъом нэсых. Нахьыбэхэм Хьаджыкъо къушъхьэ тIуакIэр арагъэлъэгъу. Мыгъэ апэрэу гъогууанэм Рыфабгъо псыкъефэххэр хагъэуцуагъэх ыкIи апэрэ къэкIогъум изэфэхьысыжьхэмкIэ ар агу рихьыгъ.

— Ахэм ежь зекIохэр къакIэлъэIугъэх. Илъэс заулэ хъугъэу къакIохэрэр кIэ горэм фэягъэх. Арыти, псыкъефэххэр къыхэтхыгъэх. Уахътэу экскурсием телъы­тагъэмкIэ ащ унэсыни къыщыпкIухьанэу, къэб­гъэзэжьынэу игъо уефэ. Ащ фэшъхьафэу лъэпкъ шхыныгъохэм нэIуасэ зафэшIыгъэныр къыздыхэлъы­тэгъэ гъогуонитIу тиIэщт, — къыддэгощагъ зекIохэр Адыгеим щыхьэкIэгъэнхэм фэгъэзэгъэ лэжьапIэу «Ярмарка отдыха» зыфиIорэм ипащэу Елена Козловар.
Къушъхьэлъэ Адыгеим ичIыопс саугъэтхэм афэ­шъхьа­фэу зекIохэр Мыекъуапэ нэIуасэ фашIыгъэх. Лъэгъупхъэ чIыпIэу иIэхэр арагъэлъэгъугъэх. Зэрэхабзэу пчыхьэшъхьэшхэ IэшIум зекIохэм адыгэ шхыныгъохэр къыщяжэщтыгъэх. Республикэм ыцIэ чыжьэу зыгъэIугъэ адыгэ къуаер ауплъэкIугъ. А пстэумэ лъэпкъ къашъохэр къяшIэкIыгъагъэх.
Iоныгъом и 26-м нэс гъогогъу 15-рэ зекIо мэшIокур Мыекъуапэ къыдэхьащт. ДжырэкIэ тIур къызэранэкIыгъах. Адыгэ лъэпкъ шхыныгъохэр къыздыхэлъытэгъэ гъогууанэхэр шъхьафэу чъэпыогъум рахъу­хьэх.
НэкIубгъор зыгъэхьазырыгъэр
Анцокъо Ирин.
Сурэтхэр: авторыр.