КIэлэцIыкIу театральнэ купхэм яя VI-рэ фестиваль Адыгеим щыкIуагъ. Iофтхьабзэр Кощхьэблэ районым ит къуаджэу Фэдз культурэм и Унэу дэтым щызэхащагъ.

Ащ хэлажьэхэрэм япчъагъэ илъэс къэс нахьыбэ зэрэхъурэм дакIоу, яIэпэIэсэныгъи хэхъо. Къэбэртэе-Бэлъкъарым, Къэрэщэе-Щэрджэсым, Дагъыстаным, Чэчэн Республикэм, Темыр Осетием, Краснодар ыкIи Ставрополь крайхэм, Ростов хэкум ыкIи Адыгеим ащызэлъа­шIэрэ кIэлэцIыкIу театральнэ куп 25-рэ зэхахьэм къекIолIагъ. ТекIоныгъэм ия 80-рэ илъэс къыдыхэлъытагъэу Хэгъэгу зэошхом фэгъэхьыгъэ къэгъэлъэгъон пычыгъохэр зэнэкъокъум къыщагъэлъэгъуагъэх. АР-м и Лъэпкъ культурэ и Гупчэ Адыгэ Республикэм культурэмкIэ и Министерствэ иIэпыIэгъоу Iофтхьабзэм кIэщакIо фэхъугъэх.
КIэлэцIыкIу театральнэ купхэм яфестиваль шIуфэс гущыIэхэмкIэ къы­зэIуихыгъ АР-м культурэмкIэ иминистрэ игуадзэу Кушъу Светланэ.
— Культурэм епхыгъэ Iофтхьабзэхэм язэхэщэн Адыгеим мэхьэнэ ин щыраты. КIэлэцIыкIу фестивалым ипшъэрылъ шъхьаIэр искусствэм хэхъоныгъэхэр егъэшIыгъэнхэр, сэнаущыгъэ зыхэлъ ныбжьыкIэхэр къыхэгъэщынхэр ары. КIэлэцIыкIумэ афытегъэпсыхьэгъэ къэгъэлъэгъонхэр нахьыбэу зэхэщэгъэнхэр театральнэ фестивалым къыдыхэлъытагъ, театрэр шIу зылъэгъурэ купхэр зэрепхых. ТекIоныгъэм ия 80-рэ илъэс къыдыхэлъы­тагъэу Хэгъэгу зэошхом фэгъэхьыгъэ къэгъэлъэгъон пычыгъохэр зэнэкъокъум къырахьылIагъэх. Фестивалым илъэсыбэ хъугъэу къеблэгъэрэ купхэр хьакIэу тлъытэжьхэрэп, ахэр тиныбджэгъу шъып­къэ хъугъэх, — къыIуагъ Кушъу Светланэ.
— Культурэм епхыгъэ Iофтхьабзэхэм язэхэщэн Адыгеим мэхьэнэ ин щыраты. КIэлэцIыкIу театральнэ купхэм ясэнаущыгъэ хагъэхъонэу сафэлъаIо, — къы­Iуагъ Кощхьэблэ районым иадминистрацие ипащэу Хьамырзэ Заур.
Фестивалым ишIуагъэкIэ шъолъырыбэмэ къарыкIыгъэ кIэлэцIыкIу сэнаущхэм культурэмрэ искусствэмрэ алъэныкъокIэ гъэхъагъэу щыIэхэм нэIуасэ зафашIын амал яIагъ. Театральнэ купхэм яIофшIагъэхэр зэрифэшъуашэу къагъэлъэгъуагъэх.
Iофтхьабзэм ихьакIэу, КъБР-м ыкIи Ингушетием культурэмкIэ язаслуженнэ IофышIэу, театрэу «Нарткъалэм» ирежис­серэу Галина Сапрыкинам къыIуагъ:
— Iофтхьабзэм яплIэнэрэу мыгъэ тыхэлажьэ. Адыгеим фэбэныгъэ хэлъэу къызэрэщытпэгъокIыгъэхэр лъэшэу тигуа­пэ. Непэрэ къэгъэлъэгъоныр цIыфхэм агу рихьыгъэу, сценэм тет актермэ яжабзэ IупкIэу, зэхэугуфыкIыгъэу анэсыгъэу сэлъытэ. 1941 – 1945-рэ илъэсхэм щыIэгъэ Хэгъэгу зэошхом фэгъэхьыгъэ пычыгъохэр къэшIыгъуаех, гугъэузых. Арэу щытми, кIэлэцIыкIухэм зэхэшIэ ин фыряIэу ахэр къагъэлъэгъуагъ. ТапэкIи АР-м икIэлэцIыкIу театрэхэм зэпхыныгъэ адытиIэным, Iоф зэдэтшIэным тыщэгугъы. Театрэм лъэныкъуабэ иI: спектаклэр огъэхьазыры, ролыр зэогъашIэ, режиссерым Iоф дэошIэ. Залым кIым-сымэу чIэтымкIэ зэхэтшIагъ цIыфэу къэкIуагъэ­хэм къэгъэлъэгъоным мэхьанэу иIэр алъыдгъэIэсын зэрэтлъэкIыгъэр. Мыщ фэдэ шъолъыр фестивальхэм язэхэщэн мэхьанэшхо зэриIэм щэч хэлъэп. Фестивалым и Гран-при къызэрэтфагъэшъошагъэм лъэшэу тырэгушхо.
Ростов хэкур къэзыгъэлъэгъогъэ Старозолотовскэ кIэлэцIыкIу камернэ музыкальнэ-драматическэ театрэу «Фатум» зыфиIорэм ипащэу Виктор Георгиевыр иеплъыкIэкIэ къыддэгощагъ:
— Хэгъэгу зэошхом ТекIоныгъэр къыз­щыдахыгъэр илъэс 80 зэрэхъурэм фэгъэ­хьыгъэ Iофтхьабзэм имэхьанэ лIэужыкIэм къыгурыдгъэIоныр типшъэрылъ шъхьаI. Ахэм титарихъ ашIэн фае. Фестивалыр зэпхыныгъэм илъэмыдж, илъагъу. Ащ дакIоу шъолъыр зэфэшъхьафмэ къарыкIы­гъэ ныбжьыкIэхэр ныбджэгъу зэфэ­хъугъэх.
Гран-прир фагъэшъошагъ КъБР-м ипсэупIэу Нарткъалэ итеатрэу «Волшебный мир» зыфиIорэм. Зэнэкъокъум илауреат хъугъэх Джэджэ районым ит культурэм и Унэ иныбжьыкIэ театральнэ купэу «Калейдоскопыр», Ростов хэкур къэзыгъэлъэгъогъэ Старозолотовскэ кIэ­лэцIыкIу камернэ музыкальнэ-драматическэ театрэу «Фатумыр», Шэуджэн районымкIэ Къэбэхьаблэ дэт культурэм и Унэ икупэу «Тэрпэзанхэр». Кощхьэблэ районым иадминистрацие ипащэ ишIу­хьафтын фагъэшъошагъ Адыгэкъалэ къи­кIыгъэ купэу «Жъогъобын» зыфиIорэм.
Iофтхьабзэр джэгу хъураекIэ зэфа­шIыжьыгъ.