Культурэ хэхъоныгъэхэм я Гупчэу «Ошъад» зыфиIоу псэупIэу Гавердовскэм дэтым адыгэ культурэм и Мафэ щыхагъэунэфыкIыгъ. АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ащ кIэщакIо фэхъугъ. Мыекъуапэ дзэ къулыкъур щызыхьырэ ныбжьыкIэхэр, къутырым щыпсэухэрэр, зекIохэр зэхахьэм хэлэжьагъэх.

Едыдж Викторие хьакIэхэм къапэгъо­кIыгъ, къулыкъу зыхьыхэрэм Гупчэм имузей аригъэлъэгъугъ, адыгэ шэн-хэбзэ дахэхэр къафиIотагъ.
Комитетым иIофышIэу Нэхэе Саидэ мэфэкI Iофтхьабзэр къызэIуихыгъ.
— Федеральнэ программэу «Къэралыгъо лъэпкъ политикэм игъэцэкIэн» зыфиIорэм мыгъэ Адыгэ Республикэр хэлажьэ, ащ къыдыхэлъытагъэу адыгэ ыкIи урыс культурэхэм ямафэхэр шъо­лъырым имуниципалитетхэм ащызэхэтэщэх. Лъэпкъ зэгурыIоныгъэмрэ мамырныгъэмрэ ягъэпытэн проектыр фэIорышIэ. Гавердовскэм щыпсэухэрэр адыгэ культурэм нэIуасэ фэтшIынхэр непэ пшъэрылъ шъхьаIэу тиI. Къулыкъу зыхьырэ ныбжьыкIэхэр непэ тимэфэкI зэрэ­хэлажьэ­хэрэм лъэшэу тегъэгушхо, — къыIуагъ Нэхэе Саидэ.
Творческэ зэхахьэу «Ошъадэм» хэт адыгэ лъэпкъ къашъомкIэ ансамблэу «Синдикэм», лъэпкъ Iэмэ-псымэхэмкIэ ансамблэу «Бэгъэуджым», фольклор-этнографическэ ансамблэу «Ащэмэзым», Хъурэнэ Азэ мэфэкI концерт къатыгъ.
Адыгэ культурэм и Мафэ фэгъэхьыгъэ Iофтхьабзэр лъэпкъ культурэр куоу зэгъэшIэгъэным, тапэкIэ лъэпкъыр зэкъо­уцожьыным, лъэпкъ гушъхьэлэжьыгъэм хэхъоныгъэхэр егъэшIыгъэным фэIорышIэ. Ащ дакIоу адыгэ культурэр Дунэе культурэм изы Iахьэу зэрэщытыр ныбжьыкIэхэм агурыгъэIогъэныр пшъэрылъ шъхьаI.
— Урысыер — лъэпкъыбэ зыщыпсэурэ къэралыгъу. ЫкIи непэ тизыкIыныгъэ зыгъэпытэхэрэм ащыщ лъэпкъ культурэ зэфэшъхьафхэм ябаиныгъэ, яхэушъхьафыкIыгъэ. Лъэпкъ шэн-хабзэхэр къэухъу­мэгъэнхэм мыщ фэдэ Iофтхьабзэхэр фэIорышIэх, нахь тызэрэшIэным, тызэхэхьаным иамалхэр къытфызэIуахы. Адыгэхэм якультурэ бай ятэгъашIэ, ятэгъэлъэгъу. Тызэкъотмэ, тызэрэлъэшыр нафэ, — хигъэунэфыкIыгъ Едыдж Викторие.
— Сэ Сыбыр сыкъыщыхъугъ, Мыекъуа­пэ къулыкъу щысэхьы. Непэрэ мэфэкIыр шIухьафтын шъыпкъэ сфэхъугъ. Адыгэ лъэпкъ къашъомрэ орэдымрэ зыщызэIукIэгъэхэ сценэм сиумэхъыгъ. Къэ­шъуа­кIохэм апкъ зэраIыгъым, кIалэхэр лъапэкIэ зэрэуцухэрэр, пшъашъэхэр зы гъунэпкъэ гъэтхъыгъэм итхэу къызэрэшъохэрэр лъэшэу сыгу рихьыгъ. Лъэпкъ пэпчъ къырыпшIэжьэу ишъуаши, икъа­шъуи, имэкъами зэрэщытыр непи зы­хэсшIагъ, — къыIуагъ Родион Пуховым.
Къутырым щыпсэухэрэм псэолъакIэр шIухьафтын шъыпкъэ зэрафэхъугъэр, мэфэкIэу Гупчэм щызэхащэхэрэм мэхьанэшхо зэриIэр цIыфхэм хагъэунэфыкIыгъ. Джырэ уахътэм диштэрэ унэр ныбжьыкIэхэр лъэпкъ творчествэм хэщэгъэнхэмкIэ амалышIоу щыт.
— Культурнэ хэхъоныгъэм и Гупчэу Гавердовскэм къыщызэIуахыгъэм лъэшэу тыщыгушIукIыгъ. Адыгэ культурэм и Мафэу непэ зэхащагъэм сисабыищ къэс­щагъ. Тилъэпкъ икъашъуи, иорэди, ишэн- хабзи язгъэлъэгъугъ. Адыгеим икультурнэ кIэн, ижъырэ адыгэ ыкIи джырэ уахътэм аусыгъэ орэдхэр, гур зыгъэ­псынкIэрэ къашъохэр, лъэпкъ музыкальнэ Iэмэ-псымэхэм къапкъырыкIырэ мэкъамэхэр Iофтхьабзэм щытлъэгъугъэх, щызэхэтхыгъэх. Лъэпкъ искусствэм итарихъ тапэкIи сибын езгъэшIэщт,— къыIуагъ къутырым щыпсэурэ Къащый Аминэт.
МэфэкIым къекIолIагъэхэр творческэ купхэм къагъэхьазырыгъэ къэгъэлъэгъон­хэм яплъыгъэх. Культурэр лъэпкъхэм языкIыныгъэ зэрэфэлажьэрэр мы зэхахьэм джыри зэ къыушыхьатыгъ.
НэкIубгъор зыгъэхьазырыгъэр
Лъэпшъыкъо Фатим.
Сурэтхэр авторым иех.