Шъуяплъынэу шъурагъэблагъэ
Мы къэблэгъэрэ зыгъэпсэфыгъо мафэхэм спортыр, анахьэу футболымрэ волейболымрэ, зыгу рихьыхэрэр зэплъынхэ алъэкIыщт зэнэкъокъу зэфэшъхьафхэр щыIэщтых.
Футболым лъыплъэхэрэр непэ, пчыхьэм сыхьатыр 5-м республикэ стадионым рагъэблагъэх. ФутболымкIэ Урысыем ипервенствэ иятIонэрэ лигэ хэт «Зэкъошныгъэр» Назрань къэзыгъэлъэгъорэ «Ангуштым» IукIэщт. БлэкIыгъэ турым тикомандэ апэрэ текIоныгъэр къыдихыгъ. Сергей Мирошниченкэм ыгъэсэрэ тифутболистхэм яешIакIэ рагъэхъуным, зэIукIэгъур хьакIэхэм къашIуахьыным лъэшэу тыщэгугъы.
«Зэкъошныгъэм» имызакъоу, футболымкIэ Адыгэ Республикэм ипервенствэ мэлылъфэгъум и 27-м рагъажьэ. Мыщ ныбжьыкIэхэр ары зыщызыушэтыщтхэр. Зэнэкъокъум хэлэжьэнхэу команди 8-мэ зыкъагъэлъэгъуагъ: «Адыгэкъал», «АГУ Мыекъуапэ», «ДЮСШ» (Джэджэ район), «Чэчэнай» (Теуцожь район), «Урожай» (Мыекъопэ район), «Кавказ» (Красногвардейскэ район), «Тэхъутэмыкъуай» ыкIи «Кощхьабл U-14». ЗэIукIэгъухэр мафэм сыхьатыр 3-м рагъэжьэщтых, ыпэ зыцIэ къетIохэрэр бысымхэр ары.
Апэрэ турым зэдешIэщтых: «Адыгэкъал» — «Кощхьабл U-14», «АГУ Мыекъуапэ» — «Кавказ», «ДЮСШ» — «Урожай», «Чэчэнай» — «Тэхъутэмыкъуай».
Джащ фэдэу мэлылъфэгъум и 27-м стадионэу «Юность» зыфиIорэм щызэIукIэщтых Краснодар краим иапшъэрэ лигэ щешIэхэрэ командэхэу «Зэкъошныгъ-2» ыкIи «Кубань Холдинг-2». Александр Белоусрэ Роман Малаховымрэ агъэсэрэ кIалэхэм гъэхъэгъэшIу ашIынэу афэтэIо. Адыгеир мы зэнэкъокъум къыщызыгъэлъагъохэрэр 2008-рэ илъэсым къэхъугъэ кIалэхэр ары. ЗэIукIэгъур мафэм сыхьатыр 4-м рагъэжьэщт, ащ уеплъыным пае ыпкIэ лъыптын ищыкIагъэп.
Футболым имызакъоу, волейболыр зыгу рихьыхэрэм гъэшIэгъоныбэ къапыщылъ. Мы спорт лъэпкъымкIэ Мыекъуапэ ичемпионат ыкIэм фэкIуагъ. ТекIоныгъэм ыкIи хагъэунэфыкIырэ чIыпIэхэм афэбэнэрэ хъулъфыгъэ командэхэр мэлылъфэгъум и 27-м зэдешIэщтых. ЗэIукIэгъухэр Адыгэ къэралыгъо университетым испортзал щыкIощтых. Апэ ящэнэрэ чIыпIэм фэбэнэщтых «Авангардымрэ» «Шытхьалэмрэ», ащ ыуж «ПК МГТУ» ыкIи «Приставы» зыфиIорэ командэхэм язэIукIэгъу чемпион хъущтыр къыщынэфэщт.
Футболыр, волейболыр зыгу рихьыхэрэр мы зэIукIэгъухэм яплъынхэу зэхэщакIохэм рагъэблагъэх.