ТекIоныгъэм и Мафэ ипэгъокIэу Адыгеим икIыгъэ лIы­кIо куп Волгоград кIуагъэ Хэгъэгу зэ­ошхом илъэхъан къэлэ-лIыхъужъыр къаухъумэзэ зыпсэ зытыгъэхэм яшIэжь агъэлъэпIэнэу.

Республикэм иветеран ор­ганизациехэм, ныбжьыкIэ ыкIи дзэ-патриотическэ объединениехэм ахэтхэр лIыкIо купым хэхьагъэх.
Шъугу къэдгъэкIыжьын, 2020-рэ илъэсым Мамаев Iуашъхьэм тет Дзэ мемо­риальнэ къэхалъэм пэгъунэгъоу шIэжь саугъэтэу ШIэжь Тхылъ зэIухыгъэ теплъэ зиIэр щагъэуцугъагъ. Ащ бзитIукIэ тетхагъ:
«Адыгеим ыкъохэу, ыпхъухэу Сталинград иухъумакIохэм егъэшIэрэ щытхъур яй.
Вечная слава сыновьям ­и дочерям Адыгеи — защит­никам Сталин­града».
ЛIыкIо купыр саугъэтым Iухьагъ, ащ къэгъагъэхэр кIэлъыралъхьагъэх.
Волгоград ишъхьафитныгъэ пае кIогъэ заом тиреспубликэ щыщ дзэкIолI къызэрыкIо ыкIи офицер 475-рэ щыхэкIодагъ, джыри нэбгырэ 808-мэ яунэхэм къагъэзэжьыгъ бгъэ­халъхьэхэу «Сталинград къызэрау­хъумагъэм пай» зыфиIорэр ахэлъэу. Хэгъэгу зэошхор макIофэ Адыгеим икIыгъэхэу зэкIэмкIи зэуапIэхэм ащыфэхыгъэр нэбгырэ мин 30-м ехъу. Мы къэбарыр Адыгеим и ЛIышъхьэу КъумпIыл Мурат исоциальнэ нэкIубгъохэм къаригъэхьагъ, шIэжьыр мыкIосэным, шъхьафитныгъэм икъызэтегъэнэн зыфызэшIо­кIыгъэхэр тщымыгъупшэнхэм имэхьанэ джыри зэ къыкIигъэтхъыгъ.