Я 47-рэ Московскэ дунэе кинофестивалыр къэралыгъом икъэлэ шъхьаIэ щыкIуагъ. УФ-м икинематографистхэм я Союз иотделениеу АР-м щыIэм ипащэу Нэгъэплъэ Аскэрбый ащ хэлэжьагъ.

Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм Iофтхьабзэр фэгъэхьыгъагъ. Хэгъэгу 50-мэ якинофильмэ 200-м ехъу дунэе кинофестивалым хэлэжьагъ.
Пшъэрылъ шъхьаIэу зэнэкъокъум иIэр режиссермэ ясэнаущыгъэ къыхэгъэщыгъэныр, яIоф фэгъэчэфыгъэн­хэр, ыпэкIэ нахь рагъэхъун алъэкIыным иамалхэр ягъэгъотыгъэнхэр, джащ фэдэу ныбжьыкIэмэ гъэхъагъэхэр ашIынхэмкIэ IэпыIэгъу афэхъугъэныр ары.
Борис Васильевым иповесть техыгъэ кинофильмэу «В списках не значился» зыфиIорэмкIэ кинофестивалыр къызэIуахыгъ. Сергей Коротаевым иIофшIагъэ заом фэгъэхьыгъ. Актер цIэрыIоу Владимир Машковым роль шъхьаIэр къыщишIыгъ.
Зэнэкъокъу шъхьаIэм фильмэ 12 хэхьагъ. ТекIоныгъэ къыдэзыхыгъэ лIэужым лIыгъэу зэрихьагъэр ахэм къащыгъэлъэгъуагъ.
Режиссерэу Андрей Зайцевым тырихыгъэ «Двое в одной жизни, не считая собаки», Михаил Архиповым иIофшIагъэу «Планета» ыкIи Стася Толстаям ифильмэу «Семейное счастье» зыфиIохэрэр зэнэкъокъу шъхьаIэм хэхьагъэх. Испанскэ режиссерэу ыкIи продюсерэу Луис Миньярро осэшI купым ипэщагъ.
— Дунэе фестивалыр зэпхыныгъэм илъэмыдж, илъагъу. Урысыем культурэмкIэ и Министерствэ илIыкIохэм зэIукIэгъухэр адысиIагъ, проектыкIэхэм татегущыIагъ. Анахьэу кинематографиемкIэ ыкIи цифрэ хэхъоныгъэмкIэ департаментым иотдел ипащэу Елена Сидоренкэм сызэрыIукIагъэм лъэшэу сигъэрэзагъ. УФ-м икинематографистхэм я Союз иотделениеу АР-м щыIэм иIофыгъохэр зэхэтфыгъэх. Я V-рэ зэнэкъокъу-кинофестивалэу «Адыгеир, шIу усэлъэгъу!» зыфиIорэм дунэе мэхьанэ иIэ тшIыным фытегъэпсыхьэгъэ тхьапэхэр дгъэхьазырыгъэх. Мы Iофтхьабзэм игъунапкъэхэм нахь зяд­гъэушъомбгъущт. Ащ дакIоу лъэпкъ кинематографием лъэбэкъукIэхэр ышIынхэм тыдэлэ­жьэщт, — къыIуагъ Нэгъэплъэ Аскэрбый.

Лъэпшъыкъо Фатим.