Мы уахътэм гумэкIыгъоу къэуцухэрэм ащыщ фитыныгъэ ямыIэу бэхэм мотоциклэ лъэпкъхэр зэрэзэрафэхэрэр. Ащ епхыгъэу полицейскэхэм нахьыжъхэм зафагъазэ зыныбжь имыкъугъэхэу, водительскэ удостоверение зимыIэхэм мототехникэр агъэIорышIэныр афамыдэнэу.

Гъатхэм мототранспортыр нахьыбэу гъогухэм къатехьэу зэрэхъугъэм къыхэкIэу Адыгеим и Къэралыгъо автоинспекторхэм ахэр зыгъэIорышIэхэрэм афытегъэ­псыхьэгъэ пэшIорыгъэшъ Iофтхьабзэ зэхащагъ. Мыхэм гъогурыкIоным ишапхъэхэр аукъох, арышъ хъугъэ-шIагъэу гъогухэм къатехъухьэхэрэм янахьыбэр мыхэм ялажьэкIэ мэхъух.
Полицейскэхэм щэрэхъитIу зыкIэт транспортыр зикIасэхэм ар зепфэнымкIэ ищыкIэгъэ категорие зытет водительскэ удостоверениер аIыгъын, агъэфедэрэ транспортыр тхыгъэн, зыухъумэхэрэ шъуашэр ащыгъын зэрэфаер агу къагъэкIы­жьыгъ. Байкерхэм зафагъазэзэ псынкIэу мычъэнхэу, зикIогъур блатIупщынэу, азыфагу илъ зэпэчыжьагъэм ишапхъэ къыдыхалъытэнэу, ыпэкIэ къикIырэ транспортым илъэныкъо темыхьанхэу араIуагъ.