Укъэбзалъэхэм язэте­гъэпсыхьанкIэ IофшIэнхэр Мыекъуапэ щаухыгъэх. Псэуалъэм иапэрэ комплекс атIупщынэу агъэхьазыры.

Адыгеим и ЛIышъхьэу Къум­пIыл Мурат къызэрэ­хигъэщыгъэмкIэ, республикэм иинженер инфраструктурэ зезыгъэушъомбгъущт мыщ фэдэ проектышхор федеральнэ гупчэм иIэпыIэгъу­кIэ агъэцэкIэн алъэкIыгъ.
Чэзыу заулэкIэ IофшIэнхэр зэшIуахыгъэх. 1960 — 1980-рэ илъэсхэм агъэпсыгъэгъэ укъэбзалъэхэу бэшIагъэу гъэ­цэкIэжьын IофшIэнхэр зэрашIылIэн фэягъэхэр агъэкIэжьыгъэх. Къалэм унэ­хэр жъугъэу зэрэщагъэпсырэм къыхэкIэу ахэм япшъэ­рылъхэу зыхэхъуа­гъэхэр афы­зэшIомыхыжь хъугъагъэ.

«ПсэолъэшIыным зызэрэрагъэушъомбгъурэм епхыгъэу 1965-рэ, 1980-рэ илъэсхэм агъэпсыгъэгъэ технологическэ линиитIу зыхэт укъэбзалъэхэр уахътэм диштэу зэтегъэпсыхьэжьыгъэнхэ фаеу пшъэрылъ къэуцугъагъ. Апэрэ комплексым ишIын непэкIэ аухыгъах, укъэбза­лъэхэм амалэу яIэм ащ къыхигъэхъуагъ», — къыIуагъ Урысые Федерацием псэолъэшIынымкIэ ыкIи псэу­пIэ-коммунальнэ хъызмэтымкIэ иминистрэ игуадзэу Юрий Гордеевым.
Псэуалъэхэм ягъэкIэжьынкIэ пэрыт технологиехэр къызфагъэфедагъэх, джырэ уахътэм диштэрэ оборудованиер агъэуцугъ. Резервуархэр, насос станциехэр, псыр зэраукъэбзырэ, дезинфекцие зэрашIырэ блокыр ыкIи нэмыкI псэуалъэхэр агъэпсыгъэх. АР-м транспортымкIэ, псэолъэшIынымкIэ, псэупIэ-­коммунальнэ хъызмэтымкIэ и Минис­терствэ испециалистхэм къызэраIуа­гъэмкIэ, системакIэр экологическэ шап­хъэхэм адештэ, щынэгъончъэуи щыт. Псэу агъэфедагъэр тIогъогогъо аукъэ­бзыжьы, ультрафиолеткIэ бактериехэр агъэкIодых. Федеральнэ бюджет учреждениеу «РосСтройКонтроль» зыфиIорэм иинспекторхэр гъэцэкIэжьын IофшIэнхэр зэрэзэхащэхэрэм лъыплъагъэх.
«Комплексым игъэIорышIэнкIэ автоматизированнэ системэр къызфагъэ­федагъ. Ащ ишIуагъэкIэ оборудованием Iоф зэришIэрэм, псым изытет, нэмыкI лъэныкъохэм гъунэ алъафы», — къы­Iуагъ «РосСтройКонтроль» игенеральнэ пащэу Владимир Щербининым.
Инфраструктурэм изегъэушъомб­гъункIэ Iофэу зэрахьэхэрэм мэхьа­нэшхо зэряIэр, УФ-м и Правительствэ иIэпыIэгъукIэ республикэм хэхъоныгъакIэхэр зэришIырэр Адыгеим и ЛIышъхьэ къыхигъэщыгъ.
«Мыекъуапэ псынкIэу хэхъоныгъэ ешIы, унакIэхэр, социальнэ псэолъа­кIэхэр щагъэпсых. Экономикэм зыкъегъэIэтыгъэнымкIэ, инвестициехэр нахьыбэу къытхалъхьанымкIэ гухэлъыбэ тиI. А пстэуми ящыкIэгъэ инфраструктурэр яIэн фае. Укъэбзалъэхэр нахь зэрэзэтырагъэпсыхьагъэхэр пшъэрылъхэм ягъэцэкIэнкIэ лъэбэкъоу тыдзыгъэхэм, цIыфхэм ящыIэкIэ-псэукIэ нахь зыкъезыгъэIэтыщт амалхэм зэу ащыщых», — къыIуагъ КъумпIыл Мурат.