Шъэожъыем лъэхъух
Краснодар краим щыщ илъэс 11 зыныбжь Iэтахъоу янэ-ятэхэм ягъусэу Адыгеим къэкIуагъэр зыдэщыIэр амышIэу зэрэкIодыгъэм епхыгъэ зэхэфын Iофхэр Урысыем и Следственнэ комитет иследственнэ ГъэIорышIапIэу АР-м щыIэм регъэкIокIых
ЗэрагъэунэфыгъэмкIэ, 2025-рэ илъэсым мэлылъфэгъум и 20-м Мыекъопэ районым ит поселкэу Никель дэжь псыхъоу Шъхьэгуащэ инэпкъ Iутэу Iэтахъор цIанлъи, псыхъом хэфагъ. Шъэожъыем ятэ икIалэ къыгъэнэжьынэу гуIагъэ, ау ар фызэшIокIыгъэп.
Хъугъэ-шIагъэр зыщыхъугъэ чIыпIэр следовательхэм ыкIи специалистхэм къаплъыхьагъ, ащ рихьылIагъэхэм гущыIэгъу афэхъугъэх, лъыхъун Iофтхьабзэхэр зэрахьэх.
УплъэкIунхэр зэрэрекIокIыхэрэм Урысыем и Следственнэ комитет иследственнэ ГъэIорышIапIэу АР-м щыIэм ипащэу Василий Лариныр лъэплъэ.
Урысыем и Следственнэ комитет иследственнэ
ГъэIорышIапIэу АР-м щыIэм ипресс-къулыкъу