Псыхъоу Шъхьэгуащэ рафтинг щыкIозэ, къечъэхыпIэм хъулъфыгъэр зэрэщыхэкIо­да­гъэм епхыгъэ уплъэкIунхэр Урысыем и Следственнэ комитет иследственнэ ГъэIорышIапIэу АР-м щыIэм зэхищыгъ.

ЗэрагъэунэфыгъэмкIэ, Мые­къопэ районым ит псэупIэу ХъымыщкIэй дэжькIэ псыхъоу Шъхьэгуащэ къехызэ, куп зэ­рысыгъэ къуашъор зэпыригъэзагъ. Ащ исыгъэ нэбгы­риплIыр ыкIи инструкторыр псым хэфагъэх. Ахэм ащыщ зы нэбгырэр псы­орым къыхэкIыжьышъугъэп, ытхьэ­лагъ.
УплъэкIунхэм къызэрагъэлъэ­гъуагъэмкIэ, мыхэм ахэтыгъэ инструкторым цIыфхэр псым къыщырищэкIынхэмкIэ ыкIи зэ­хэщэн Iофтхьабзэхэр афызэхищэнхэмкIэ ищыкIэгъэ тхылъыр иIагъэп.
Мы хъугъэ-шIагъэм лъапсэ фэхъугъэр агъэунэфы. Адыгеим щыкIогъэ рафтингым хэлэжьагъэхэр Урысыем ишъолъырхэм къарыкIыгъэх. Мы мафэхэм мыщ фэгъэхьыгъэ уголовнэ Iофыр къызэIуахыщт.