Мэлылъфэгъум и 23-м патриотическэ Iофтхьабзэ «Мэздахэ» идэкIояпIэ ылъа­псэ щыкIуагъ.

Хэгъэгу зэошхом ТекIоныгъэр къыз­щыдахыгъэр илъэс 80 зэрэхъурэм фэгъэхьыгъэу ар зэхащагъ. Iофтхьабзэм хэлэжьагъэхэм орэдэу «Катюша» къызэдаIуагъ.
МысатыушI акционер обществэу «Физическэ культурэмрэ спортымрэ хэхъоныгъэ ягъэшIыгъэнымкIэ Гуп­чэм» ипроектэу «Активные люди 4» зыфиIорэм дэлажьэхэрэр, «НыбжьыкIэ гвардием» и Адыгэ шъолъыр къутамэ, муниципальнэ образованиеу «Къалэу Мыекъуапэ» культурэмкIэ игъэIорышIапIэ ащ икIэщэкIуагъэх.
Проектэу «Активные люди» икIэщакIохэу Марина Мельникрэ Галина Каташевскаямрэ Iофтхьабзэм къыщыхагъэщыгъ лъэпкъ ыкIи лIэуж зэфэшъхьафхэр бэ хъухэу мэфэкIым зэрэхэлажьэхэрэр.
— Непэрэ зэхахьэр Хэгъэгум иухъумакIо и Илъэс къыдыхэлъытагъэу зэхэтщагъ. Хэгъэгу зэошхом хэмыкIокIэжьын лъэуж къыгъэнагъ. Тихэгъэгу ишъхьафитыныгъэ, итарихъ ыкIи икультурэ, неущырэ мафэм ицыхьэ зытелъыжьэу зэрэфакIорэм, цIыф лъэпкъыбэмэ зыкIыныгъэрэ зэдегъэштэныгъэрэ азыфагу илъэу Урысыем зэрэщыпсэухэрэм мы Iоф­тхьабзэр яшыхьат. КъыткIэхъухьэхэ­рэм я Хэгъэгу шIу алъэгъоу гъэсэ­гъэнхэр тимурад шъхьаI, — къыIуагъ Марина Мельник.
— ЛIэшIэгъухэр пытэу зэзыпхырэ мэфэкIышхоу ТекIоныгъэм и Мафэ мэхьанэшхо иI. Хэгъэгу зэошхор зау­хыгъэр бэшIагъэ, ау ащ иджэрпэджэжь джы къызнэсыгъэми зэхэтэхы. ЛIэ­ужхэр зэгъусэхэу непэ къаIогъэ орэ­дыр ТекIоныгъэм иджэмакъэу тари­хъым хэхьагъ. Анахьыжъэу Iоф­тхьабзэм хэлэжьагъэм илъэс 87-рэ, ана­хьыкIэм илъэси 4 аныбжь, — къы­хигъэщыгъ Галина Каташевскаям.
Адыгэхэр, урысхэр, къэзэкъхэр, ермэлхэр, къэндзалхэр, нэмыкI лъэпкъ­хэри зэгъусэхэу дэкIояпIэм илъэоянэхэм атетхэу орэдыр къызэ­даIуагъ. Тихэгъэгу ис лъэпкъ зэмы­лIэужыгъохэм языкIыныгъэ зэрэлъэшыр Iофтхьабзэм къыщыхэщыгъ. Орэдым тамэу ратыгъэм зиIэтыгъ, мэкъэ дахэм лъагэу огум зыридзагъ. ШIэжьым фэгъэхьыгъэ орэд мэкъамэр щыIэныгъэм пытэу хэт, ар Хэгъэгу зэошхом ихьазаб иIотакIо хъугъэ.
Патриотическэ Iофтхьабзэр «ТекIоныгъэм икъашъу» зыфиIорэмкIэ аухыгъ. Флешмоб къашъор къекIо­лIэгъэ цIыкIуи ини къызэдашIыгъ.
Лъэпшъыкъо Фатим.