«АР-м мэкъумэщ хъызмэтымкIэ изаслуженнэ IофышI» зыфиIорэ щытхъуцIэр мыгъэ къызфагъэшъошагъэхэм ащыщ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Синдика-Агро» игидротехникэу, къуаджэу Улапэ щыщ Симболэт Мурат. Джырэблагъэ ащ гущыIэгъу тыфэхъугъ.

Мэкъумэщ культурэ зэфэшъхьафхэм, чъыгхатэхэм апылъэу, муниципальнэ образование заулэмэ ахэр ащызылэжьырэ хъызмэтшIапIэу Мурат зыIутым Красногвардейскэ районым пындж къы­щегъэкIы. Хэти ешIэ а культурэмкIэ псым мэхьанэшхо зэриIэр. Гидротехникым ипшъэрылъыр ащ икIэгъэхъон, нэужым ынаIэ тетыныр ары. Ащ имызакъоу, Мурат гъэIорышIэкIо IофшIэнри егъэцакIэ. ЗэрэхъурэмкIэ, ар пынджым икъэгъэкIын лъэплъэ, егъэIорышIэ. Арышъ, лэжьыгъэ бэгъуагъэ къызырахыжькIэ, хьаулыеу илъэсым чъыIи, фаби, ощхи, жьыбгъи зэрахэмытыгъэр нафэ мэхъу.
— Дзэм къулыкъу къыщысхьи къуаджэм къызысэгъэзэжьым, колхозым, ащыгъум КъумпIыл Къэралбый итхьамэтагъ, сызэрэхэхьэгъагъэу, зыпарэкIи зэпыу фэмыхъугъэу мэкъумэщ хъызмэтым сыщэлажьэ, — къы­Iуагъ ащ.
Илъэс 40-м ехъугъ мы лъэныкъом Iоф зыщишIэрэр. ПсэолъэшI сэнэхьат Краснодар щызэригъэгъотыгъагъ, ау 1982-рэ илъэсым колхозым зыхахьэм, КъумпIыл Къэралбый гидротехникэу пынджым фигъэзэгъагъ. Нэужым тракторнэ бригадэм игъэIорышIэкIуагъ, етIанэ былымэхъо фермэм ипэщагъ.

Колхозыр зызэхэкIыжьым, «Синдика-Агро» зыфиIорэ хъызмэтшIапIэу ЛIыIэпIэ Ибрахьимэ зэхищагъэм чIыгу­хэр ылэжьынхэу ыштагъэх. Пынджлэ­жьынэу абгынэжьыгъагъэми ыуж ихьажьыгъагъ. Джащыгъум Мурат гидротехник IофшIэнэу хэшIыкI мымакIэу зыфыриIагъэм фагъэзэжьыгъ, гъэIорышIакIом ипшъэрылъхэри къыратыгъэх. КъызэриIуагъэмкIэ, 2007-рэ илъэсым къыщегъэжьагъэу «Синдика-Агром» Iут.
ПстэумкIи гектар 800 мэхъу ащ ынаIэ зытет пынджыр. Илъэс къэс лэжьыгъэ бэгъуагъэ къызэрэрахырэм рыгушхоу къыкIегъэтхъы. Сыда пIомэ ежь иIоф­шIагъэ, ишIэныгъэ ащ хэлъ.
ГъэрекIо зы гектарым, гурытымкIэ лъытагъэу, центнер 64-рэ къырахы­жьыгъ. Ар къэгъэлъэгъон ин. Игъом пынджыр зэрапхъыгъэм, зэрешIушIагъэхэм, псыр ищыкIагъэм тетэу зэрэкIагъэхъуагъэм, зэрэкIагъэчъыжьыгъэм ар къыкIэкIуагъ. Мурат къызэриIуагъэмкIэ, лэжьыгъэ чылэпхъэ анахь дэгъухэр, Урысыем къыщыхахыгъэ лъэпкъхэр ары агъэфедэхэрэр, зэрэхалъхьэрэми мэхьанэ иI. Пынджыр Краснодар краим щыIуагъэкIы.
КъыгъэшIагъэм инахьыбэр пIоми хъу­нэу мэкъумэщ хъызмэтым зэрэрипхыгъэм щытхъуцIэу къыкIэкIуагъэм ежьыр­кIэ мэхьанэ зэриIэр къыкIегъэтхъы Мурат.
— Къысфагъэшъошэгъэ цIэр сэркIэ лъапIэ, сырэгушхо, — къыIуагъ ащ. — УиIофшIэн ащ фэдэу къыхагъэщымэ, уимыгопэн ылъэкIыщтэп. Мэкъумэщ Iоф­шIэным тицIыкIугъом къыщегъэжьагъэу тыфагъэсагъ. Сэ сшъхьэкIэ нэмыкI лъэныкъо зызгъэзэнэуи ныбжьи сшъхьэ къихьа­гъэп. Арышъ, сигъашIэ зэстыгъэ сиIофшIэн къызэрыкIо ащ фэдэ осэ ин къызэрэ­фашIыгъэм кIуачIэм къыхи­гъэхъуагъ.
IофшIэным зэрэфагъасэрэм имыза­къоу, пшъэрылъэу иIэхэр зэрищыкIагъэм тетэу игъом ыкIи хэзыгъэ имыIэу ыгъэ­цэкIэнхэу зэрагъэшIэгъэ лIэужхэм къа­хэхъухьагъ Мурат. Арышъ, ар ежьыркIэ шIокI зимыIэ Iоф.
Къэмыуцоу, кIозэ къыддэгущыIагъ пIоми хъущт. ИIофшIэн зэпыу фишIынэу охътабэ иIагъэп. Щэджагъохэм адэжь тызыIокIэм, пчэдыжьым жьэу иIофхэм ауж ихьэгъэ гъэIорышIакIом зэшIуихынэу игъо зыфифэгъагъэр бэ.
— Непэрэзымафэм рулым сыкIэрыс, телефоныр дэсIыгъыжь, — еIо ащ щхызэ, изы мафэ зэрэкIорэм тызыкIэупчIэм.
Ипащэхэр мы районым исхэп, арышъ, нахьыбэрэмкIэ пэIудзыгъэу зэпхыныгъэ къыдаIыгъ. НэмыкI Iофэу иIэхэм янахьыбэри телефонымкIэ зэшIуихын фаеу мэхъу. Ащ нэмыкIэу, мафэ къэс ар гъунэгъу Шытхьэлэ районым макIо, ащ хъызмэтшIапIэм иофис дэт.
Ащ къикIыжьыгъэу, селоу Штурбинэм тыщыIукIагъ. Пынджыр зылэжьыхэрэм, механизаторхэм, водительхэм, нэмыкIэу хъызмэтшIапIэм Iоф щызышIэхэрэм пчэдыжьырэ екIолIэнхэу, гъэпсэфыпIэ афэхъунэу, гущыIэм пае, къещхымэ, зыщаухъумэнэу, техникэр къырафылIэ­жьынэу чIыпIэ ащ щагъэпсы. ПсэолъэшIэу ащ Iутхэм яIофшIэн зынагъэсыгъэм зыщигъэгъуазэзэ тиупчIэхэм джэуапхэр къаритыжьыгъ. Зыщигъэгъозэгъэ закъоп, къызыддэгущыIэм ыуж ежьыри адеIэнэу кIалэхэм ахэхьагъ.
Мурат икIали ятэ игъогу техьагъ. Ари мы хъызмэтшIэпIэ дэдэм епхыгъэу Шытхьэлэ районым щылэжьэрэ «Бел— Агро» зыфиIорэм иагроном.
— Непэ сыкIэгъожьынкIэ кIасэ, — мэщхы Мурат. — Ау нахь сызэкIэIэбэжьыми, мэкъумэщ хъыз­мэтым сищыIэныгъэ зэреспхыгъэм сырыкIэгъожьэу къы­хэкIыгъэу къэсшIэжьырэп. ЦIыфым ищыIэныгъэкIэ гъомылапхъэм мэхьанэшхо иI. Ар о къэогъэкIы, Iофэу пшIэрэм шIуагъэ къызэрихьырэр олъэгъу. Зэрэхъу­рэмкIэ, хьаулыеу сыщыIагъэп.
ХЪУТ Нэфсэт.
Сурэтхэр: Iэшъынэ Аслъан.