Адыгеим и ЛIышъхьэу КъумпIыл Мурат АР-м ныбжьыкIэхэм яIоф­хэмкIэ и Комитет ­итхьаматэу Максим Галушкиным ыкIи гупчэу «Адыгеим иныбжьыкIэхэр» зыфиIорэм ипащэу Мыгу Бислъан IофшIэгъу зэIукIэгъу адыриIагъ.

ЗэдэгущыIэгъум илъэхъан анахьэу къызщыуцугъэхэр Адыгэ Республикэм ныб­жьыкIэ политикэмкIэ и Стратегие ипроектэу 2026 — 2030-рэ илъэсхэм ателъы­тагъэр ары. Мы документым ныбжьыкIэ инфраструктурэм хэхъоныгъэ ин егъэшIыгъэныр къыделъытэ. Ащ хэхьэх республикэм икъэлэ ыкIи ирайон пстэуми му­ниципальнэ ныбжьыкIэ гуп­чэхэр ащызэхэщэгъэнхэр. Джащ фэдэу Стратегием къыщыгъэнэфагъэ хъугъэх ­мы илъэс блэгъи 5-м а лъэныкъомкIэ анахьэу анаIэ зытырагъэтыщтхэр. Ахэм къахеубытэх ныбжьыкIэхэр патриотическэ проектхэм ахэщэ­гъэнхэр, гуфакIохэм зэшIуа­хыхэрэм зягъэушъомбгъугъэныр, ныбжьыкIэ зекIоным хэлэжьэнхэр, мыхъо-мышIагъэхэу ныбжьыкIэхэм къахафэхэрэр дэ­гъэзыжьыгъэнхэм, адыгэ культурэм икъэухъумэнрэ ихэхъоныгъэрэ яIахь зэрэхашIыхьащтым, ныбжьыкIэ предпринимательствэм IэпыIэгъу зэрэ­фэхъущтхэм япхыгъэ Iофы­гъохэр.
КъумпIыл Мурат къызэрэ­хигъэщыгъэмкIэ, ныбжьыкIэ по­литикэр анахь мэхьанэшхо зэратырэ лъэныкъохэм ащыщ. Республикэм ипащэхэм анаIэ зытырагъэтырэр къыткIэхъу­хьэхэрэм ягухэлъ дахэхэр къа­дэхъунхэм пае ящыкIэгъэ амал­хэр Адыгеим щягъэгъотыгъэнхэр ары.
«НыбжьыкIэхэр ары респуб­ликэм инеущрэ мафэ зыфэ­дэщтыр зэлъытыгъэр, гъэпсын IофшIэнхэм чанэу ахэлажьэхэзэ, Адыгеир ыпэкIэ лъыз­гъэкIотэщтхэр. КIэлэ ыкIи пшъэ­шъэ чанхэу, щыIэныгъэм къы­хэхъухьэхэрэр зыгу лъыIэсы­хэрэм непэ тишIуагъэ ядгъэкIын фае. Ахэм ягухэлъ гъэ­шIэгъонхэр къадэхъунхэм ыкIи обществэмкIэ мэхьанэшхо зиIэ проектхэр пхыращынхэм те­гъэпсыхьагъэу тэри тадеIэщт. КъыткIэхъухьэхэрэм тызэра­дэлэжьэщтым иамалыкIэхэм, ныбжьыкIэхэмрэ хабзэмрэ язэпхыныгъэ нахь пытэным тынаIэ атетэгъэты. ЧIыпIэхэм ащызэхащэщт ныбжьыкIэ гуп­чэхэм яшIуагъэкIэ ащ фэдэ зэдэлэжьэныгъэ-зэгъусэныгъэм ишIуагъэ къызэрэкIощтым тицыхьэ телъ. НыбжьыкIэхэр на­хьыбэрэ зэIукIэнхэмкIэ, ягухэлъ, ямурад дахэхэмкIэ зэ­хъожьынхэмкIэ а гупчэхэм яшIуагъэ къэкIощт», — къыIуагъ АР-м и ЛIышъхьэ.
Сэнаущыгъэ зыхэлъ ныб­жьыкIэхэм яслетэу «Фыщт» зыфиIорэм изыфэгъэхьазырыни мы зэIукIэгъум щытегущыIагъэх. Илъэс къэс ащ фэдэ Iофтхьабзэм ишIуагъэкIэ къушъхьэу «Фыщт» ылъапэ дэжь Адыгеим, Къэбэртэе-Бэлъкъарым, Къэрэщэе-Щэрджэсым, Краснодар краим, Къалмыкъым, Херсон хэкум ыкIи Абхъазым яныбжьыкIэ анахь чанхэу нэбгырэ 500-м ехъу лагерым щызэIокIэх. Ащ фэдэ зэхэхьэ-зэ­хэгущыIэжьхэм ялъэхъан ныбжьыкIэхэм япроектхэм заща­гъэгъуазэ, АР-м и ЛIышъхьэ ыкIи республикэм иминистрэхэм я Кабинет хэтхэм упчIэхэр аратых. Ведомствэ зэфэшъхьаф­хэм ныбжьыкIэхэр кIэщакIо зыфэхъугъэ лъэныкъохэр яIоф­шIэнкIэ къыдалъытэх.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.