ТекIоныгъэм и Ма­фэу къэбла­гъэрэм ипэгъокIэу Теуцожь райо­ным ит къуаджэу Аскъэлае Хэ­гъэгу зэошхом хэ­кIодагъэхэм ясаугъэт зэхэтэу дэтым гъэстыныпхъэ шхъуантIэу ращэ­лIагъэр атIупщыгъ.

Хэгъэгу зэошхом ТекIоны­гъэр къызщыдахыгъэр илъэс 80 зэрэхъурэм фэшI Урысыем щырахьыжьэгъэ Iофтхьабзэу «ТекIоныгъэм имашIу» зыфи­Iорэм къыдыхэлъытагъэу ащ газыр ращэлIагъ. Зэхахьэу сау­гъэтым дэжь щыкIуагъэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, ащ игуадзэу, Урысыем и ЛIыхъу­жъэу Цэй Эдуард, УФ-м и Къэралыгъо Думэ идепутатэу Хьасанэкъо Мурат, «Газпром межрегионгазым» ипащэ игуа­дзэу Юрий Пахомовскэр, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Iахьзэхэлъ обществэу «Газпром газораспределение Майкоп» зыфиIорэм ипащэу ЕкъутэкI Аслъан, нэмыкIхэри.
АР-м и ЛIышъхьэу КъумпIыл Мурат ыцIэкIэ зэхахьэм къекIолIагъэхэм за­къыфигъэзагъ шъолъыр Парламентым ипащэ. Патриотизмэм имэхьанэ гъэпытэгъэным фытегъэпсыхьэгъэ Iофыбэ республикэм зэрэщызэшIуахырэр ащ къыхигъэщыгъ.

— ТичIыпIэгъу мин 80-м ехъу заом кIогъагъ. Ахэм ащыщэу 385-р Аскъэлае дэкIыгъ, 152-мэ къагъэзэжьыгъэп. Тиу­хъумакIо пэпчъ ыцIэ хэгъэгум итарихъ дышъэ хьарыфхэмкIэ хэтхагъ, псэупIэхэм къащызэIуахыгъэ мемориальнэ пхъэмбгъухэм атетхагъ, ШIэжь тхылъым дэ­хьагъэх, — къыIуагъ Владимир Нарожнэм.

МэшIотхъуабзэу зэрэзэхагъэнагъэр Адыгэ Республикэм и Гупчэ саугъэт зэхэтэу, «ЕгъэшIэрэ машIоу», Мыекъуа­пэ дэтым, къыращыгъ. Хэзгъэнэщтхэм ар къязытыгъэхэр хэушъхьафыкIыгъэ дзэ операцием хэлажьэу, орденэу «Хэгъэгум ыпашъхьэ гъэхъагъэу щыриIэхэм апай» зыфиIорэм иорден, Жуковым ыцIэкIэ щыт медалыр къызфагъэшъошагъэхэу Сихьаджэкъо Ильяс, УФ-м самбэмкIэ спортым имастерэу Анцокъо Амир ыкIи юнармейцэу, «Движение первых» хэтэу Тимур Одинцовыр. Владимир Нарожнэм, Цэй Эдуард ыкIи Юрий Пахомовскэм машIор зэхагъэ­нагъ.
— УФ-м и Президентэу Владимир Путиным пшъэрылъ къышIыгъэу, «Газпромым» иIэпыIэгъукIэ пхыращырэ Урысые Iофтхьабзэу «ШIэжьым имашIу» зыфи­Iорэм тыхэлажьэ. «ЕгъэшIэрэ машIор» зэрэзэхэдгъэнагъэм имызакъоу, Хэ­гъэгу зэошхом хэкIодэгъэ тичIыпIэгъухэм ясаугъэт зэхэт зэрэщытэу дгъэкIэжьыгъ. Мы хъугъэ-шIагъэр ТекIоныгъэшхор къызыдахыгъэр илъэс 80 зыщыхъурэ илъэсым зэрэтефагъэм мэхьанэ ин иI. Ар къыдэзыхыгъэ лIэужхэм лIыхъужъныгъэу зэрахьагъэр илъэсипшI пчъагъэ тешIагъэми зэрэтщымыгъупшэщтым ар ишыхьат. «ЕгъэшIэрэ машIор» зыщыблэрэ мемориалыр патриотизмэм епхыгъэ Iофтхьабзэхэр зыщызэхащэщтхэ чIыпIэу Аскъэлае зэриIэщтым сицыхьэ телъ. «Газпромым», «Единэ Россием», нэмыкIэу лIэуж пчъагъэхэр зэзыпхэу, тичIыгу къэзгъэгъунагъэхэм ялIыхъужъныгъэ зэкIэми агу къэзгъэкIыжьырэ чIыпIэм игъэпсын зиIахь хэзылъхьа­гъэхэм «тхьашъуегъэпсэу» ятэIо, — ­къыщитхыгъ исоциальнэ нэкIубгъохэм ащыщ АР-м и ЛIышъхьэу КъумпIыл Мурат.
ХЪУТ Нэфсэт.