Урысыем исхэр дзэ къулы­къум фэгъэхьазырыгъэнхэм, УФ-м ишъолъырхэм ар зэращызэхэщагъэм епхыгъэ IофшIэныр Къыблэ дзэ коим анахь дэгъоу щызыгъэцакIэ­хэрэм якъыхэхынкIэ Комиссием хэтхэм я Хэгъэгу къаухъумэзэ зищыIэныгъэ зытыгъэ дзэкIолIхэм ясаугъэтэу Мыекъуапэ дэтым къэгъагъэхэр кIэралъхьагъэх.

Iофтхьабзэм хэлэжьагъэх Адыгеим и Къэралыгъо Совет — Хасэм идепутатхэр, АР-м иминистрэхэм я Кабинет хэтхэр, общественнэ зэхахьэхэм, ветеран организациехэм, патриотическэ клубхэм ялIыкIохэр, шIэныгъэлэжьхэр ыкIи творческэ цIыфхэр, ныбжьыкIэхэр, динлэжьхэр, нэмыкIхэри.
Пэублэм УФ-м и УIэшыгъэ КIуа­чIэхэм я Генеральнэ штаб и ЗэхэщэкIо-мобилизационнэ гъэIорышIэпIэ шъхьаIэ ипащэ игуадзэу Владимир Цимлянскэм лIыблэнагъэ ахэлъэу яхэгъэгу къаухъумэзэ фэхыгъэ дзэкIолIхэм яIахьылхэм ЛIыхъужъныгъэм иорденхэр аритыжьыгъэх.
Нэужым зыпсэ зытыгъэ дзэкIолI­хэм зы такъикърэ афэшъыгъуагъэх.
Зэхахьэм къекIолIагъэхэм Хэ­гъэгу зэошхом хэкIодагъэхэм яшIэжь агъэлъэпIагъ. Мыгъэ ТекIоныгъэр къызыдахыгъэр илъэс 80 мэхъу. Анахь зэо лъыгъачъэу мыр тари­хъым къыхэнагъ. Адыгеим икIыгъэ нэбгырэ мин 80 фэдиз ащ хэлэ­жьагъ, ахэм ащыщэу мин 33-р хэкIодагъ, нэбгырэ 59-р Советскэ Союзым и ЛIыхъужъ ыкIи Щытхъум иорден икавалер хъугъэх.
Урысыем исхэр дзэ къулыкъум фэгъэхьазырыгъэнхэм епхыгъэ Iоф­шIэныр шъолъырхэм зэращызэхэщагъэм фэгъэхьыгъэ зэнэкъокъоу 2024-рэ илъэсым Къыблэ дзэ коим ишъолъыр 15-мэ азыфагу зэхащагъэм республикэм апэрэ чIыпIэр щиубытыгъ. Джащ фэдэу бжыхьэ дзэ дэщыгъор Адыгеим дэгъоу щырагъэкIокIыгъ, нэбгырэ 400 фэдиз дзэм ащагъ.
Iофтхьабзэм хэлэжьагъэхэм ащыщых Урысыем и ЛIыхъужъэу Алексей Осокиным ыцIэ зыхьырэ отрядэу «Доблесть и честь» зыфи­Iорэм хэт юнармейцэхэр.
КIАРЭ Фатим.