Адыгеим икомандэу «Мэхьанэ зиIэ пкъыгъо­хэр» зыфиIорэм гъот макIэ зиIэхэм якIэлэцIыкIухэм апае джэгуа­лъэхэр еугъоих.

Къалэу Шытхьалэ ыкIи станицэу Абадзехскэм ащыпсэурэ кIэлэцIыкIухэм, унагъоу чIыпIэ къин итхэм апае джэгуалъэхэр зэраугъоихэрэм фэгъэхьыгъэ макъэ къыгъэIугъ джырэ уахътэм шIушIэ IэпыIэгъум и Гупчэу «Мэхьанэ зиIэ пкъыгъохэр» зы­фиIорэм.
Джэголъэ шъабэхэри, бжъэм хэшIыкIыгъэхэри, джащ фэдэу дэгъоу къызэтенэгъэ тхылъхэри аштэх. Ахэр Iалъмэкъым иплъхьанхэ ыкIи атептхэн фае: «Джэгуалъэхэр». Нэужым Iалъмэкъхэр контейнермэ арыплъхьанхэшъ, къагъэнэфэгъэ адрес­­хэмкIэ бгъэхьынхэу щыт:
ЩэпIэ гупчэу «Столица», къа­лэу Мыекъуапэ, урамэу Крас­нооктябрьскэр, 36-рэ, сэмэгумкIэ учIэхьэ
ЩэпIэ гупчэу «Майкоп Молл», къалэу Мыекъуапэ, ура­мэу Степнаяр, 190-рэ, гупчэ чIэхьа­пIэмкIэ учIэхьэ.
ЩэпIэ гупчэу «Черемушкэр», къалэу Мыекъуапэ, урамэу Чка­ловым, ыцIэ зыхьырэр, 71-рэ, а 1-рэ къатыр.
Къалэу Мыекъуапэ, урамэу Шоссейнэр, 22-рэ, ювелирнэ салоным идэкIояпI.
Проектэу «Мэхьанэ зиIэ пкъы­гъохэмкIэ IэпыIэгъу» зыфиIорэр гугъуемылIыныгъэ зы­хэлъ цIыфхэм ыкIи грантым яхьатыркIэ щыIэ хъугъэ. Адыгэ Республикэм игражданскэ обществэ хэхъоныгъэхэр егъэшIыгъэнхэм фэгъэхьыгъэ грантыр 2024-рэ илъэсым организацием къыдихыгъ, президентскэ грантмэ я Фонд ахъщэ тедзэ къыфишIыгъ, ащ тетэу мылъку IэпыIэгъур ащ къыратыгъ.
Проектым къыдыхэлъытагъэу командэу «Мэхьанэ зиIэ пкъыгъохэр» зыфиIорэм игъорыгъоу щыкIагъэ зиIэ цIыфхэм адэIэпыIэ. БлэкIыгъэ зыгъэпсэфыгъо мафэхэм поселкэу Тимирязевым щыпсэухэу, гъот макIэ зиIэхэм щыгъынхэр афагощыгъ, унэгъо 18-мэ арыс нэбгырэ 73-мэ IэпыIэгъу агъотыгъ. Щыгъынхэр, цуакъэхэр, джэгуалъэ­хэр — зэфэшъхьафэу бэ ящыкIагъэу цIыфмэ аIэкIагъэхьа­гъэр. Ащ ыпэкIэ поселкэу Удобнэм джащ фэдэ Iофтхьабзэ щызэхащэгъагъ.