ТекIоныгъэм ия 80-рэ илъэс къыдыхэлъытагъэу «Живая память благодарных поколений» зыфиIорэ саугъэтыр зыхашIыкIыщт ахъщэ жъгъэйхэмрэ патрон нэкIхэмрэ яугъоин кIэщакIо фэхъугъэр Беларусь ишIушIэ фондэу Алексей Талай ыцIэкIэ щытыр ары. Народнэ фрон-тым ащ фэдэ Iофтхьабзэм къыдыригъэштагъ.

Народнэ фронтым ишъолъыр гъэцэкIэкIо комитетхэм ахъщэмрэ патрон нэкIхэмрэ зыщаугъоищтхэ капсулэхэр ачIагъэуцуагъэх. ТекIоныгъэм ия 80-рэ илъэс Поклоннэ Iуашъхьэм щагъэуцунэу рахъухьэрэ саугъэтышхом ишIынкIэ ахэр къызфагъэфедэщтых.
Советскэ ахъщэ зэхэгъэчъыхьагъэр зыхэлъыщт саугъэтышхор Поклоннэ Iуашъхьэм щыгъэпсыгъэныр зигукъэкIыр паралимпийцэу, Беларусь иобщественнэ IофышIэу Алексей Талай ары. Проектэу «Живая память благодарных поколений» зыфиIорэм къыдыхэлъытэгъэ ящэнэрэ скульптурэм дзэкIолI письмэм итеплъэ иIэщт, адрэ тIур къэлэ-лIыхъужъэу Минскрэ Брест пытапIэмрэ ащагъэуцугъэх.
Урысыем и Президентэу Владимир Путинымрэ Беларусь и Президентэу Александр Лукашенкэмрэ саугъэтхэр зыхашIыкIыщт ахъщэм иугъоин ашъхьэкIэ хэлэжьагъэх. Владимир Путиным ыцIэкIэ советскэ ахъщэхэр Талай ифонд езытыгъэр Урысыем и Президент ипресс-секретарэу Дмитрий Песковыр ары. СССР-м хахьэщтыгъэ хэгъэгухэм арыс унэгъо миллиони 5-м ехъумэ мыщ фэдэ Iофтхьабзэм къыдырагъэштагъ.