Федеральнэ программэу «Къэралыгъо лъэпкъ полити-кэм игъэцэкIэн» зыфиIорэм мыгъэ Адыгэ Республикэр хэлажьэ, ащ къыдыхэлъытагъэу адыгэ ыкIи урыс культурэхэм ямафэхэр шъолъырым имуниципальнэ псэупIэхэм ащэкIох.

Мэлылъфэгъум и 17-м Теуцожь районым ит къуаджэу Лъэустэнхьаблэ адыгэ культурэм и Мафэ фэгъэхьыгъэ Iофтхьабзэхэр, Красногвардейскэ районым ит къуаджэу Улапэ урыс культурэм и Мафэ къыхиубытэхэрэр ащырагъэкIокIыгъэх. Программэхэм ахэтых тематическэ концертхэр, къэгъэлъэгъонхэр, лъэпкъ шхыныгъохэм ахэIэгъэнхэр, флешмобхэр ыкIи нэмыкIхэр.
Ахэм апэкIэ, мэлылъфэгъум и 11-м, мыщ епхыгъэ Iофтхьабзэр Шэуджэн районым щыкIуагъ. А мафэм къуаджэу Хьатыгъужъыкъуае адыгэмэ ятарихъ, яшэн-хабзэхэр зыгъэлъапIэхэрэм ягупчэ хъугъагъэ. ЗэхэщакIохэм программэ игъэкIотыгъэ къагъэхьазырыгъагъ, ащ хэтыгъэх Хьакъунэ Эльзэ, ЛIынэ Заремэ, Хьасанэкъо Хьамедэ ыкIи Дэргушъэо Маринэ яинтерактивнэ мастер-классхэр. Ахэм адакIоу хьакIэхэр адыгэ гъомлапхъэмэ ахэIэнхэ, яIэшIугъэ аушэтын алъэкIыгъ. Ижъырэ адыгэ мэкъамэхэр чIыпIэ фольклорнэ ансамблэу «ДжэгуакIом» къыхыригъэщыгъэх. Ащ ыуж концертым хэлэжьагъэх Шэуджэн районым иартистхэмрэ Кощхьэблэ районым къикIыгъэ творческэ купхэу «Мэкъамэмрэ» «Бэрэчэт Босынымрэ». КIэухым, Мамхыгъэ культурэм и Унэу дэтым илъэпкъ театрэу «Мэрджанэм» ыгъэуцугъэ спектаклэу «Джаущтэу орэхъу» зыфиIорэр къагъэлъэгъуагъ.