Темыр Осетием икIэлэеджакIохэм апае
Темыр Осетием икIэлэеджакIохэм апае онлайн экскурсие Советскэ Союзым и ЛIыхъужъэу Андырхъое Хъусен имузей щызэхащагъ.
Телелъэмыдж шапхъэм илъэу лIыхъужъныгъэм исыхьат рагъэкIокIыгъ. Республикэу Темыр Осетием — Аланием ит къуаджэу Карджин дэт еджапIэм икIэлэеджакIохэр ары ащ фэдэ амал шIагъо зиIагъэхэр. ПIуныгъэ IофшIэнымкIэ пащэм игуадзэу Боджэкъо Жаннэ къызэрэхигъэщыгъэмкIэ, зипсауныгъэ зэщыкъогъэ кIэлэцIыкIухэм афытегъэпсыхьэгъэ еджэпIэ-интернатым чIэсхэри джащ фэдэу Iофтхьабзэм къыхэлэжьагъэх.
— Сэнэхьат IэпэIэсэныгъэм зыщыхагъэхъорэ курсхэу Темыр Осетием щыкIуагъэхэм сахэлажьэзэ згъэшIэгъогъагъэ ти ЛIыхъужъэу Андырхъое Хъусен дэгъу дэдэу ащ зэрэщашIэрэр. КъызэрэнэфагъэмкIэ, 2023-рэ илъэсым ичъэпыогъу мазэ и 12-м Кавказ шъхьафит хъужьыным фэзэуагъэхэу, ЛIыхъужъыцIэ къызфагъэшъошагъэхэм апае ЛIыхъужъхэм я ЧъыгдэкI гъогу (Аллее – ред.) къуаджэу Эльхотово дэжь къыщызэIуахыгъ, ащ мыжъосын 12 щагъэуцугъ. Ахэм ащыщ Андырхъое Хъусен исаугъэти. Къуаджэу Карджин иеджапIэ чIэс кIэлэеджакIохэм лIыхъужъхэм афэгъэхьыгъэ къэбархэр аугъоих. Джащ тетэу телелъэмыджыр Советскэ Союзым и ЛIыхъужъ имузей щызэхэщэгъэнымкIэ гукъэкIыр къэхъугъ, — къыIотагъ Боджэкъо Жаннэ.
Къуаджэу Карджин иеджапIэ илIыкIомэ къызэрэхагъэщыгъэмкIэ, телелъэмыдж шапхъэм илъэу зэхащэгъэ Iофтхьабзэр мэхьанэшхо зиIэ хъугъэ-шIагъэу хагъэунэфыкIыгъ, ащ кIэлэеджакIомэ япатриотизмагъэ къыIэтыгъ, Хэгъэгу зэошхом ТекIоныгъэу къыщыдахыгъэм фэгъэхьыгъэ тарихъым джыри зэ хигъэплъэжьыгъэх.