АР-м и ЛIышъхьэу КъумпIыл Мурат иунашъокIэ къэбзэныгъэм имафэхэр гъэтхапэм и 14-м тишъолъыр щырагъэжьагъэх ыкIи ахэр мэлылъфэгъум и 26-м нэс кIощтых. Ащ къыдыхэлъытагъэу, жъоныгъокIэ зыгъэпсэфыгъохэм яхъулIэу республикэм игъэкъэбзэн фэIорышIэрэ зичэзыу шIыхьаф тыгъуасэ Адыгеим щырагъэкIокIыгъ.

Ащ хэлэжьагъэх гъэцэкIэкIо хэбзэ къулыкъухэр, Къэралыгъо Совет – Хасэм хэтхэр, общественнэ ыкIи сатыу организациехэр, гуфакIохэр.
АР-м тыкъэзыуцухьэрэ дунаим икъэ­ухъумэнрэ чIыопс къэкIуапIэхэмрэкIэ и ГъэIорышIапIэ IофшIэным изэхэщэн фэгъэзагъ ыкIи къэралыгъо хэбзэ къулыкъухэм чIыпIэу агъэкъэбзэщтхэр афигъэнэфагъ. ГъэIорышIапIэм къэралыгъо-экологическэ лъыплъэнымкIэ иотдел испециалист-экспертэу Лъэустэнджэл Рузанэ къызэриIуагъэмкIэ, Iоф­тхьабзэр мыгъэ нахь игъэкIотыгъэу зэхащэ.

— АР-м и ЛIышъхьэу КъумпIыл Мурат къызэрэтфигъэнэфа­гъэмкIэ, Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм епхыгъэу шэмбэт шIыхьафхэм язэхэщэн нахь зядгъэушъомбгъугъ. ЧIыпIэхэу дгъэ­къэбзэщтхэм заом хэкIодагъэ­хэм ямемориал зэхэтэу ЕгъэшIэрэ машIор зыщыблэрэр, нэмыкI саугъэтхэр ахэдгъэхъуа­гъэх. Джащ фэдэу, къалэм игъунапкъэхэм апхырыкIырэ урамхэу я 2-рэ Пионерскэр (быслъымэн къэхалъэм екIурэр), Транспортнэр, Низпоташнэр, Адыгейскэмрэ переулкэу Аэродромнэмрэ зыщызэуалIэхэрэр къедгъэубытыгъэх, — хигъэунэфыкIыгъ Лъэустэнджэл Рузанэ.
ТигущыIэгъу къызэрэхигъэщыгъэмкIэ, шэмбэт шIыхьафхэр зэкIэ муниципалитетхэм ащырагъэкIокIыщтых, къэбзэныгъэм щалъыплъэщтых. Районхэм ащыкIощт Iофтхьабзэхэм пэшIорыгъэшъэу нэбгырэ мини 10 фэдиз ахэлэжьэщт. Республикэм икъэлэ шъхьаIэ щыкIогъэ шIыхьафым гъэцэкIэкIо хабзэм икъулыкъушIэ 500 фэдиз къырищэлIагъ.
Мыекъуапэ икъэбзагъэкIэ, икIэрэкIагъэкIэ, идэхагъэкIэ сыдигъуи нэмыкI къалэхэм къахэщы. А Iофым фэгумэкIырэ, фэгъэзэгъэ цIыфхэм ар яшIушIагъэу щыт. Зым ыгъэкъабзэрэр нэмыкIхэм амыушIоижьэу, пстэуми тIэ зэкIэдза­гъэу къэбзэныгъэм тыдэлажьэмэ, тикъалэ джыри нахь кIэракIэ зэрэхъущтым щэч хэлъэп.
Iэшъынэ Сусан.