ЦIыфхэм IофшIэпIэ чIыпIэхэр ягъэгъотыгъэнхэм, медицинэм епхыгъэ учреждениехэм социальнэ зэдэлэжьэныгъэ зэдыряIэным фэгъэхьыгъэ зэзэгъыныгъэм, нэмыкIхэм зыщатегущыIэгъэхэ зэхэсыгъо иIагъ социальнэ-IофшIэн зэфыщытыкIэхэм ягъэзекIонкIэ АР-м илъэныкъуищ комиссие. Ащ АР-м иминистрэхэм я Кабинет хэтхэр, профсоюз организациехэм, IофшIэпIэ чIыпIэхэр къэзытыхэрэм ялIыкIохэр хэхьэх. Iофтхьабзэр зэрищагъ АР-м и Правительствэ и Тхьаматэ игуадзэу, финансхэмкIэ министрэу Виктор Орловым.

Iофыгъохэм атегущыIэнхэу рамыгъа­жьэзэ «IофшIэныр къэухъумэгъэнымкIэ организацие анахь дэгъур» зыфиIорэ республикэ зэнэкъокъоу 2024-рэ илъэсым зэхащэгъагъэр зэфахьысыжьыгъ. АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч текIоныгъэр къыдэзыхыгъэхэм дипломхэмрэ ахъщэ шIухьафтынхэмрэ аритыжьыгъэх.
Сатыу организациеу хэлэжьагъэхэмкIэ апэрэ чIыпIэр ыхьыгъ «Газпром трансгаз Краснодар» зыфиIорэ компанием МыекъуапэкIэ икъутамэ, пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Питейный домыр» ятIонэрэ хъугъэ, ящэнэрэ чIыпIэр ыубы­тыгъ зэфэшIыгъэ Iахьзэхэлъ обществэу «Щэм хэшIыкIыгъэ гъомылапхъэхэр къэзышIырэ заводэу Адыгейскэм».
«IофшIэныр къэухъумэгъэнымкIэ мысатыу организацие анахь дэгъур» зыфи­Iорэ лъэныкъомкIэ пэрытныгъэр ыхьыгъ кIэлэцIыкIу IыгъыпIэу N 21-м, ятIонэрэ ыкIи ящэнэрэ чIыпIэхэр аубытыгъэх цIыфхэм социальнэ фэIо-фашIэхэр афэгъэцэкIэгъэнхэмкIэ Шэуджэн ыкIи Красногвардейскэ районхэм ягупчэхэм.
Мырзэ Джанбэч текIоныгъэр къыдэзыхыгъэхэм къафэгушIуагъ, мыхэр нэмыкI хъызмэтшIапIэхэмкIэ, организациехэмкIэ щысэтехыпIэу зэрэщытхэм къыкIигъэтхъызэ, тапэкIи ащ къыщамыгъэкIэнэу, IофшIэным икъэухъумэн зэкIэми лъэшэу анаIэ тырагъэтынэу зэращыгугъыхэрэр къыIуагъ.
Нэужым цIыфхэм IофшIэпIэ чIыпIэхэр ягъэгъотыгъэнхэм фытегъэпсыхьэгъэ программэр 2024-рэ илъэсым гъэцэкIагъэ зэрэхъугъэм къыщигъэгъозагъэх мы лъэныкъом фэгъэзэгъэ къэралыгъо къулыкъум и ГъэIорышIапIэ ипащэу Галина Цыганковам. Ащ къызэриIуагъэм­кIэ, гъэрекIо нэбгырэ мини 3 фэдизмэ IофшIэпIэ чIыпIэ ящыкIагъэу закъыфагъэзагъ, 1900-м ехъумэ IэпыIэгъу аратыгъ.
ЦIыфэу къяуалIэхэрэм апагъохынэу IофшIэпIэ чIыпIэ 17606-рэ мы уахътэм щыI. Ащ щыгъуазэр нахьыбэ хъуным, зищыкIагъэхэр ахэплъэшъунхэм, IофшIэпIэ чIыпIэ нэкIэу щыIэхэр къагъэлъэгъон­хэм афэшI илъэс къэс ермэлыкъхэр зэхащэх.
Джащ фэдэу мы зэхэсыгъом медицинэм епхыгъэ учреждениехэм социальнэ зэдэлэжьэныгъэ зэдыряIэным фэгъэхьыгъэ зэзэгъыныгъэу зэдашIыгъэ­хэм ягъэцэкIэн, культурэм ылъэныкъокIэ апшъэрэ гъэсэныгъэ зэзыгъэгъотыгъэу, еджапIэр къэзыухыгъэкIэ ныбжьыкIэхэм IэпыIэгъу ятыгъэным, шъолъыр лъэныкъуищ зэзэгъыныгъэр 2024-рэ илъэсым гъэцэкIагъэ зэрэхъугъэм, нэмыкIхэм щатегущыIагъэх.
Зэхэсыгъом АР-м псауныгъэр къэухъу­мэгъэнымкIэ и Министерствэ социальнэ зэдэлэжьэныгъэм изегъэушъомбгъункIэ, социальнэ-IофшIэн зэфыщытыкIэхэр тэрэзэу гъэзекIогъэнхэмкIэ медицинэм щылажьэхэрэм япрофсоюз организацие зэпхыныгъэ зэрэдыриIэр, шIуагъэ къытэу Iоф зэрэзэдашIэрэр къыщыхагъэщыгъ.
ЗытегущыIагъэхэм епхыгъэу унэшъо гъэнэфагъэхэр ашIыгъэх, ахэр зыфэгъэ­зэгъэ къулыкъухэм агъэцэкIэнхэу афагъэхьыщтых.
ХЪУТ Нэфсэт.
Сурэтыр: АР-м IофшIэнымкIэ ыкIи социальнэ хэхъоныгъэмкIэ и Министерств.