Муниципальнэ программэу «Адыгеим икъэлэ шъхьаIэ иныбжьыкIэхэр» зыфиIорэм къыдыхэлъытагъэу Хэгъэгу зэошхом ТекIоныгъэр тикъэралыгъо къызщыдихыгъэр илъэс 80 зэрэхъурэм ехъулIэу лIыхъужъныгъэ зезыхьагъэхэр зыдэлъ къэхалъэхэмрэ щытхъум и Аллеерэ агъэкъэбзагъэх.

Мыекъопэ къэлэ администрацием ныбжьыкIэ политикэмкIэ иотдел ипащэу Егор Сергеевым къызэрэтиIуагъэмкIэ, шIушIэ Iофтхьабзэу «Экологическэ десант» зыфиIорэр илъэс къэс гъатхэм ыкIи бжыхьэм зэхащэ. Iахьылхэр зимыIэжьхэу, илъэс пчъагъэкIэ узэкIэIэ­бэжьмэ зидунай зыхъожьыгъэхэу къэ­хэм алъыплъэн зимыIэжьхэри мыщ дэлъых. Ахэр агъэкъэбзэнхэр, зищыкIэгъэ чIыпIэхэр къагъэлэнхэр мы Iоф­тхьабзэм изэхэщакIохэм япшъэрылъ шъхьаI. МэфитIум къыкIоцI гурыт сэнэхьат зэзыгъэгъотырэ студент 350-рэ фэдиз шIушIэ Iофтхьабзэм хэлэжьагъ. Ахэр анахьэу ныбжьыкIэ движение зэфэшъхьафхэм ахэтых.
— Мы Iофтхьабзэр шIыхьаф закъоу щымытэу патриотическэ мэхьанэ иI. ЛIыхъужъныгъэ зэрахьэзэ непэрэ мамыр щыIакIэм фэбэнагъэхэм якъэхэр тэгъэкъабзэх, уасэ афэтэшIы, шIэжьыр тэгъэлъапIэ. Джащ фэдэу чъыгхэм къапытэкъугъэ тхьапэхэр, уцыжъхэр тэугъоих ыкIи Iутэщых, чъыг цIыкIухэр итэупкIых, — къыIуагъ Егор Сергеевым.
— Мыщ фэдэ шIушIэ Iофтхьабзэ зэрэзэхащэрэр къызысаIом сыхэлэжьэнэу тесыубытагъ, сыда пIомэ тинахьыжъхэр мыщ дэлъых, зиIахьылхэр щымыIэжьхэм якъэ зэхэкIыхьагъэхэр дгъэкъэбзагъэх, — къыIуагъ Мыекъо­пэ индустриальнэ техникумым истуденткэу Камила Галаян.
— Къэбзэныгъэм уфэбэнэныр, хэкIыр Iупхын закъор арэп мыщ къыдилъытэрэр, тинахьыжъхэм яшIэжь дгъэлъэпIэн фае. Щытхъум и Аллее, нэмыкI къэхэри зэрэдгъэкъэбзагъэхэмкIэ мэхьанэ ин иIэу, пшъэрылъэу тиIэр дгъэцэкIагъэу къысшIошIы, — къы­Iуагъ искусствэмкIэ колледжэу Тхьабысымэ Умарэ ыцIэ зыхьырэм щеджэрэ Валерия Володько.
ДЕЛЭКЪО Анет.
Сурэтыр: Iэшъынэ Аслъан.