Партиеу «Единэ Россиер» кIэщакIо фэхъугъэу апэрэу зэхащэрэ Урысые зэнэкъокъоу «Къоджэ почтальон» зыфиIорэм Адыгеир хэлажьэ. Мэлылъфэгъум и 15-м шъолъыр зэхэщэкIо комитетыр зэхэсыгъ, комиссиер агъэнэфагъ.

Зэнэкъокъум къызэрэщыдэлъытагъэмкIэ, нэбгырэ мин 50-м шIомыкIэу зыдэс псэупIэхэм япочтальонхэу, IофшIэгъэ илъэс нахь мымакIэ зиIэхэр ары хэлэжьэн зылъэкIыщтхэр. ШIо­игъо­ныгъэ зиIэхэм лъэIу тхылъэу къатыгъэ­хэм мэлылъфэгъум и 19-м къыщыублагъэу жъоныгъуакIэм и 1-м нэс шъолъыр комиссиехэр ахэплъэщтых, ахэм финалым ихьащтхэр къыхахыщтых. Ар очнэ шIыкIэм тетэу Москва щы- кIощт.
— Къоджэ почтальонхэр агъэлъэпIэрэ, шъхьэкIафэ зыфашIырэ цIыфых, ахэр зэкIэми ашIэх. Нэжъ-Iужъыбэхэм почтальоныр къызыкIокIэ ямэфэкI. Сыда пIомэ ахэм гъэзетхэр, письмэхэр къы­зэрахьыхэрэм имызакъоу, гур къа­Iэты, сыдигъуи щыIэны­гъэм уадытегущыIэн плъэкIыщт. Зэнэкъокъур почтэм иIофышIэу, къоджэ псэупIэм лъэшэу ищыкIэгъэ сэнэхьатыр къы­хэзыхыгъэхэр къыхэгъэщыгъэнхэм фытегъэпсыхьагъ, — къыIуагъ АР-м и Къэ­ралыгъо Совет — Хасэм и Тхьаматэу Владимир Нарожнэм.
УФ-м и Президентэу Владимир Путиным пшъэрылъ къызэришIыгъэу, «Единэ Россиер» хэлажьэзэ къоджэ почтэхэр зэрагъэкIэжьыхэрэри ащ къы­хигъэхъожьыгъ.