ТекIоныгъэшхом и Мафэ изыфэгъэхьазырын зэрэкIорэм фэгъэхьыгъэу Адыгеим и ЛIышъхьэ къыIотагъ.
Мыекъуапэ, республикэм инэмыкI псэупIэхэм Хэгъэгу зэошхом тикъэралыгъо ТекIоныгъэ къызэрэщыдихыгъэм фэгъэхьыгъэ нэпэеплъхэр нахьыбэу ащагъэуцухэ, ащыпалъэ­хэ хъугъэ.
Мыекъуапэ ыкIэм щыфэкIо игупчэ шъхьаIэу Лениным ыцIэ зыхьырэм игъэкIэжьын. Мы чIыпIэм ТекIоныгъэм и Мафэ щыпэгъокIыщтых – Мыекъопэ дзэ гарнизоным, егъэ­джэн авиабазэм, хэбзэухъумакIохэм якъулыкъушIэхэр ыкIи юнармейцэхэр къырыкIощтых, мэфэкI Iофтхьабзэхэр щызэхащэщт.
«Анахьэу джащ фэдэу тынаIэ зытедгъэтырэр мэфэкIэу тиветеранхэр анахь шъхьаIэу зыхэтыщтхэм къыдыхэлъытэгъэщтхэр ары. Ащ ехъулIэу пстэуми къатефэрэ федеральнэ ыкIи шъолъыр тынхэр аIэкIагъэхьащтых. Ветеран пэпчъ фэгумэкIынхэу республикэм имуниципальнэ псэупIэхэм япащэхэм апашъхьэ пшъэрылъ ит.
Патриотическэ Iофтхьабзэхэм ащыщыбэр ТекIоныгъэ къы­дэзыхыгъэ лIэужым лIыгъэу зэрихьагъэм зэрэфэдгъэшъуа­шэрэм дыкIыгъоу ащ ычIыпIэ иуцуагъэхэми, хэушъхьафыкIыгъэ дзэ операцием хэлажьэхэрэми афэтэгъэхьы. Ахэм IэпыIэгъу ягъэгъотыгъэным пае зэпымыурэ IофшIэнэу зэхэтщагъэр дгъэлъэшыгъэ Хэгъэгум иухъумакIо и Илъэс къыдыхэлъытэгъэ IофтхьабзэхэмкIэ. Ахэм яз сэнэхьат ухьазы­рыныгъэмкIэ шъолъыр программэу «Адыгеим илIыхъужъхэр».
Мы IофшIэным шIуагъэ къытыным, ТекIоныгъэшхом и Мафи гум къинэжьэу, тищыIэныгъэкIэ анахь мэхьэнэ ин зиIэу щытыным апае ищыкIэгъэ пстэури шIэгъэн фае», — къащитхыгъ исоциальнэ нэкIубгъохэм КъумпIыл Мурат.