«КъокIыпIэм имузей сакурэр къыщытIэмыгъ» зыфиIорэ Iофтхьабзэр КъокIыпIэм щыпсэурэ лъэпкъхэм яискусствэкIэ Къэра­лыгъо музеим и Темыр Кавказ къутамэу Мыекъуапэ щыIэм щыкIуагъ. Мыщ фэгъэхьыгъэ фестива­лыр ятфэ­нэрэу зэхащагъ. Къэгъэлъэ­гъонхэр, IэрышI пкъыгъохэм ягъэхьазырынкIэ егъэджэн сыхьатхэр, сурэтшIынхэр, джэгукIэ ыкIи нэмыкI гъэшIэгъоныбэ мэфэкIым къыдыхэлъытэгъагъэх.

Мыекъуапэ итворческэ купхэм къагъэхьазырыгъэ къэгъэлъэгъонхэмкIэ фестивалым ихьакIэхэм апэгъокIыгъэх. Купхэу «Сюрприз», «Шпаргалка» зыфиIохэрэм ахэтхэм искусствэхэмкIэ колледжым истудентхэу Нэхэе Тэмарэрэ Анастасия Ментасашвилирэ рагъаджэ­хэрэм ыкIи нэмыкIхэм хореографическэ композицие гъэшIэгъонхэр къашIыгъэх. СурэтышIхэм, лъэпкъ IэшIагъэхэмкIэ IэпэIасэхэм, ятIэм, пхъэм, гъучIым Iоф адэзышIэхэрэм, къэкIыхэрэм адэлажьэхэ­рэм якъэгъэлъэгъуапIэхэр щагум щыгъэ­псыгъагъэх. Джащ фэдэу музей кIоцIым щыкIорэ къэгъэлъэгъонхэм мы мафэм Iоф ашIагъ, лекциехэр ащыкIуагъэх. Музеим ищагу зэрэщытэу фестивалым иIофтхьабзэхэм зэлъаубытыгъ.
Музеим ипащэу ШъэуапцIэкъо Аминэт Iофтхьабзэр къызэIуихыгъ.
— Сакурэм икъэтIэмыгъо тхьамэфитIу фэдиз къыдэфэ. Гукъау нахь мышIэми, ахэр зэкIэ къызэдызэIуихыхэрэп. Ау ядэхагъэ зэрагъэлъэгъунымкIэ цIыфхэм нахь охътабэ яI. Мы чъыгхэм ядэхагъэ зэбгъэлъэгъущтмэ Японием нэс укIон ищыкIагъэп, ахэр музей щагум къыдэкIэх, къытфэкIуагъэхэм лъэшэу тышъуфэраз, — къыIуагъ ШъэуапцIэкъо Аминэт.
Япон чъыгхатэм итарихъ 2014-рэ илъэсым къыщежьэ. Ащ дэжьым а уахътэм музеим Кушъу Нэфсэт ипэщагъ. Апэрэ чъыгхэр республикэм ипащэу ТхьакIущынэ Аслъан игукъэкIкIэ щагум дагъэтIысхьэгъагъэх. Чъыг 63-м зи хэмыкIодыкIэу къэкIыгъ.

Японием итамыгъэу декоративнэ чэрэз чъыг лъэпкъэу сакурэр мы уахътэм къэтIэмыгъ. Музеим ищагу мыщ фэдэ чъыг 63-рэ дэт. ШъэуапцIэкъо Аминэт къызэриIорэмкIэ, мыщ фэдэ чъыг лъэпкъиплI ахэр мэхъух. Апэрэ сакурэ лъэпкъым икъэтIэмыгъо текIыгъах, тхьэпэ фыжьыбзэу къырихыгъагъэхэри пытэкъужьыгъэх. ЯтIонэрэм икъэгъагъэ­хэр шэплъыбзэу къырехы къодый. Ащ ыуж ящэнэрэ ыкIи яплIэнэрэ сакурэхэр къэтIэмыщтых.
Ижъырэ искусствэу дышъэидэным пылъ IэпэIасэхэу Сет Сафыет, Гумэ Ларисэ яIэшIагъэхэр къагъэлъэгъуагъ.
— Мыщ фэдэ уагъэ шъагъэр сакурэм икъэгъагъ фэдэу егъэджэн сыхьатым щытшIыгъ. Адыгэ лъэпкъым итамыгъэхэр япон чъыгым икъэгъагъ щыдгъэфедагъэх, — къыIуагъ Сет Сафыет.
— Фестивалым лIэужыкIэу къекIолIагъэхэм лъэпкъым идышъэидагъэ хъи­шъэу пылъыр ядгъашIэзэ япон чэрэзыр дышъэ IуданэкIэ хэтыдыкIыгъ. Уагъэр дышъэ IуданэкIэ тыблагъ, къэгъагъэм исурэт хэтыблыкIыжьыгъ, — къыIуагъ Гумэ Ларисэ.
Фестивалыр щэджагъом къыщыублагъэу пчыхьэм нэс кIуагъэ. Зэхахьэм цIыфыбэ щызэблэкIыгъ.
Лъэпшъыкъо Фатим.