Мыгъэ Iуахыжьыщт бжыхьэсэ лэжьыгъэу Адыгеим ичIыгулэжьхэм апхъи къыхэкIыгъэм дэгъу дэди, щыкIагъэхэр зиIэхэри ахэтых. Ар Урысыем имэкъу­мэщ Гупчэ и Адыгэ шъолъыр къутамэ иIофышIэхэм уплъэкIунэу зэхащэгъагъэхэм къагъэлъэгъуагъ.

ПстэумкIи гектар мини 108-м ехъу бжыхьасэу республикэм иI. Ащ щыщэу мин 88-рэ фэдизыр коцым рагъэубы­тыгъ, гектар мини 8-м хьэ, мин 12-м рапс ахалъхьагъ. Коцымрэ хьэмрэ язытет уигъэрэзэнэу щытэу ары къызэрэтаIуа­гъэр. Ау, рапсым инахьыбэм ом зэхъо­кIыныгъэу фэхъугъэхэр егоуагъэх, агъэ­кIо­дыгъ пIоми хъущт, ащ фэдэ чIыпIэхэм гъэтхэ культурэхэр атырапхъэжьынхэм тегущыIэх.
Бжыхьасэхэм янахьыбэм гъомылапхъэ е былымIус зыхашIыкIыщт ахалъхьэрэр, ау ащ имызакъоу, къыкIэлъыкIорэ гъэм лэжьыгъэ чылапхъэ ашIыщтым мымакIэу рагъэубыты хъугъэ. Ащ фэдэ бжыхьасэхэм язытети хэушъхьафыкIыгъэу «Россельхозцентрэм» икъутамэ игугъу къыщашIыгъ.
Лэжьыгъэ чылапхъэ къатырахынэу бжыхьэсэ гектар мини 10 фэдиз мыгъэ яI. Чылэпхъэ лэжьыным фэгъэхьыгъэ федеральнэ хэбзэгъэуцугъэм къызэрэ­дэлъытагъэм тетэу, кIэ лъэпкъэу апхъы­гъэм зыкъызэригъэлъэгъуагъэр, идэгъугъэ, къыхэкIыгъэм изытет илъэсым гъогогъуитIурэ, къызщыхэкIыгъэ дэдэм ыкIи лэжьыгъэр къызырахыжьыгъэм, зэрагъа­шIэ. Шъолъырым ихъызмэтшIапIэхэм афэхъущтым фэдиз чылэпхъэ дэгъу къэ­гъэкIыгъэныр ары а IофшIэнхэм пшъэ­рылъ шъхьаIэу яIэр.
«Россельхозцентрэм» и Адыгэ шъо­лъыр къутамэ къызэрэщаIуагъэмкIэ, респуб­ликэм ичIыгулэжьхэм чылапхъэу агъэфедэрэм ипроцент 80-р ежьхэм къагъэкIы хъугъэ. Лэжьыгъэ чылапхъэм идэгъугъэ елъытыгъ къырахыжьыщтым ибагъи, изытети. Ащ фэшI, чылапхъэр зытепхъэ­гъэ хьасэм уц шIоеу къыхэкIэн ылъэкIыщтыр зыфэдизыр, хьацIэ-пIацIэхэр къы­хэхьа­гъэхэмэ, чылапхъэм къыхэкIыгъэу уз къяолIагъэмэ мыгужъоу зыщагъэгъо­зэнэу лэжьыгъэр къыхэкIыгъэ къодыеу специалистхэр хэхьэх. Джащ фэдэу лэжьыгъэу къыхэкIыгъэм зэпахырэ уз къыхэхьагъэмэ лабораторием щауплъэкIу.
УзгъэгумэкIын къыхагъэщымэ игъом ищыкIагъэр рашIылIэным мэхьанэшхо иI. Арышъ, уплъэкIун пстэумэ ауж хъызмэтшIа­пIэ пэпчъ илэжьыгъэ изытет, зиягъэ къекIыщт уц шIойхэм, хьацIэ-пIацIэхэм е узхэм ащыухъумэгъэнхэм фэшI шIэгъэн фаехэр зэрытхэгъэ тхылъхэр фагъэхьы.
ХЪУТ Нэфсэт.