Адыгеимрэ къалэу Краснодаррэ зэзыпхыхэрэ лъэмыджэу «ТургеневскэкIэ» заджэхэрэм игъэцэкIэжьын зэрэрагъэжьагъэм фэшI тыгъуасэ чэщым ащ ызыныкъо зэфашIыгъ. Ащ ыпкъ къикIэу автомобильхэм язекIон къины хъугъэ, пчэдыжьым бэу щызэIукIагъ.

IофшIэнхэр едзыгъуи 4-у зэшIуахыщтых, автомобильхэм якIуапIэ Iахь-Iахьэу зэблахъузэ зэфашIыщтых. Краснодар иадминистрацие ипресс-къулыкъу къызэритыгъэмкIэ, джабгъу лъэныкъор зэфэшIыгъэщт, сэмэгум автомашинэхэр щызэблэкIышъунхэу ашIыщт. Лъэмыджым укъызехыкIэ Буденнэм ыкIи Игнатов зэшхэм ацIэ зыхьырэ урамхэм лъэныкъо закъокIэ арычъэнхэу щытыщт.
— ЛъэсрыкIохэри щынэгъончъэу зекIонхэм фэшI Краснодар икIэу Верхнебаканскэ кIорэ автомобиль гъогоу А-146-м икъежьапIэм агъэIорышIэрэ зэпырыкIыпIэ щагъэпсыщт, — къыщаIуагъ АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие ипресс-къулыкъу.
ГъогурыкIоным хэлажьэхэрэм лъэмыджым игъэцэкIэжьын зэрэрагъэжьагъэр къыдалъытэнышъ, язекIон нахь зыгъэпсынкIэщт нэмыкI кIуапIэ къыхахынэу, шапхъэхэр амыукъонхэу Адыгеим и Къэралыгъо автоинспекцие къяджэ.