Федеральнэ автомобиль гъогухэм я ГъэIорышIапIэу «Черноморье» зыфиIорэм Кавказ биосфернэ заповедникым екIоу, Адыгеир зэпызычырэм игъэцэкIэжьын лъегъэкIуатэ.

Ащ фэшI гъогузекIоным а чIыпIэм къыщыщагъэ­кIагъ. Гъогум ызыныкъохэр зэблахъузэ зэфашIыщтых, автомобильхэр щызэблэкIышъунхэм пае гъогу гъунэри агъэфедэщт. Ащ нэмыкIэу чIыпIэ зэфэшъхьафхэм охътэ гъэнэфагъэкIэ «реверсивнэ» зекIуакIэр ащыхагъэхьащт. А шIыкIэр жъоныгъуакIэм и 12-м щыублагъэу чъэпыогъум и 1-м нэс агъэфедэщт.
ГъэIорышIапIэр мы гъунапкъэхэр зэрэхагъэхьагъэхэм ушъхьагъу гъэнэфагъэ зэриIэр къызэхашIыкIынэу, тамыгъэу къагъэуцугъэхэм, агъэтхъыгъэхэм афэсакъын­хэу водительхэм къяджэ.
«Адыгеяавтодорым» къызэрэщаIуагъэмкIэ, охътэ гъэнэфагъэкIэ джыри чIыпIитIумэ гъогурыкIоным гъу­напкъэхэр ащыфашIыгъэх. Мэлъылъфэгъум и 18-м пчэдыжьым сыхьатыр 10-м щыублагъэу мафэм 3-м нэс поселкэу Краснооктябрьскэм икIэу Курджипскэр зэпичызэ, Дагестанскэм екIурэ гъогум ия 7-рэ километрэ щегъэжьагъэу ия 27-м нэс, мэлылъфэгъум и 19-м иащ фэдэ сыхьатхэм Мыекъуапэ икIэу ТIуапсэ кIорэ гъогум ия 8-рэ километрэ щегъэжьагъэу ия 24-м нэс автомобильхэм язекIон къащы­щагъэкIэщт.