Мэлылъфэгъум и 18-м IофшIапIэ ягъэгъотыгъэ­нымкIэ Урысые ермэлыкъым ишъолъыр едзыгъоу «Работа России. Время возможностей» зыфиIорэр Адыгеим щыкIощт. Мыекъуапэ ыкIи Тэхъутэмыкъое районым яплощадкэ анахь инхэм Iофтхьабзэр ащыкIощт.

Ермэлыкъым IофшIапIэ языгъэгъотырэ организацие 49-рэ хэлэжьэщт, ахэм ахэтых предприятие инхэм ялIыкIохэр. IофшIэн лъыхъухэрэр IофшIэпIэ чIыпIэ 1940-м ехъумэ ащагъэгъозэщтых. Ащ нэмыкIэу шъо­лъыр едзыгъом хахьэу апэрэу «Сэнэхьатым ифестиваль» зыфиIорэр щыIэщт. Сэнэхьат къыхэхыным епхыгъэ Iофтхьабзэр анахь шъхьаIэхэм ащыщ, непэ нахь ящыкIагъэхэм имызакъоу тапэкIи зимэхьанэ мыкIодыщт сэнэхьатхэм зыщагъэгъозэн алъэкIыщт.
УпчIэжьэгъухэм, джащ фэдэу зыми емыпхыгъэ экспертхэм IофшIапIэ лъыхъухэрэм IэпыIэгъу афэхъу­щтых. Ащ нэмыкIэу къэгъэлъэгъонхэр, мастер-классхэр ыкIи тренингхэр зэхащэщтых.
«IофшIапIэ арагъэгъотынымкIэ Урысые ермэлы­къыр 2023-рэ илъэсым къыщегъэжьагъэу Адыгеим щызэхащэ ыкIи илъэс къэс мыщ хэлажьэхэрэм япчъагъэ хэхъо. 2024-рэ илъэсым ащ нэбгырэ 80-м ехъу къекIолIагъ, IофшIэпIэ чIыпIэ 3658-мэ ащагъэгъозагъэх. Iофтхьабзэм зэкIэмкIи нэбгырэ 2600-м ехъу хэлэжьагъ. Ахэм ащыщэу 1055-мэ IофшIапIэхэр арагъэгъотыгъ», — къыIуагъ цIыфхэм IофшIапIэ ягъэ­гъотыгъэнымкIэ федеральнэ къулыкъум и ГъэIорышIапIэу Адыгеим щыIэм ипащэу Галина Цыганковам.