Мы мэфэкIыр хэгъэгу кIоцI IофхэмкIэ къулыкъу­хэм яподразделение зэфэшъхьафхэм илъэс пчъагъэхэм Iоф ащызышIагъэхэм афэгъэхьыгъ ыкIи 2004-рэ илъэсым къыщегъэжьагъэу хагъэунэфыкIы. АР-м хэгъэгу кIоцI IофхэмкIэ и Министерствэ иветеран движение анахьэу ынаIэ зытыригъэтырэр, Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм ипэгъокIэу зэрахьэрэ IофшIэныр «Адыгэ макъэм» къыфиIотагъ ащ ипащэ игуадзэу, отставкэм щыIэ милицием иполковникэу Николай Киселевым.
Адыгеим имилицие зыщыIэм щыублагъэу зэлъа­шIэрэ ыкIи гъэхъагъэ зиIэ цIыфыбэмэ къулыкъур щахьыгъ. Ахэр къалэжьыгъэ пенсием тIысыжьыгъэх нахь мышIэми, унэм исхэп, ветеранхэм я Совет хэтхэу афэлъэкIыщтымкIэ республикэм иобщественнэ щыIакIэ хэлажьэх, хэбзэухъумакIохэм ясатыр къы­хэхьэгъэ ныбжьыкIэхэр хэгъэгъозэгъэнхэмкIэ яшIуагъэ къагъакIо.
— Адыгэ Республикэм хэгъэгу кIоцI IофхэмкIэ и Министерствэ иветеранхэм я Совет хэтхэм япшъэ­рылъ зэхъокIырэп. БзэджэшIагъэхэр къэмыхъунхэм фытегъэпсыхьэгъэ Iофтхьабзэхэр рагъэкIокIых, ныбжьыкIэмэ зэIукIэгъухэр адашIых. Полицием къыхэхьэгъэ ныбжьыкIэхэм яхэгъэгу шIу алъэгъоу гъэсэгъэнхэм, илъэс пчъагъэрэ сэнэхьатым рылэжьагъэхэм ахэр зыдагъэсэнхэм тынаIэ тетэгъэты, хэбзэухъумэкIо къу­лыкъухэм фыщытыкIэ дэгъу къафыряIэным обществэр зэрэфэтщэщтым тыдэлажьэ. Джащ фэдэу зыныбжь хэкIотэгъэ тиIофшIэгъугъэхэу IэпыIэгъу зищыкIагъэхэм тишIуагъэ ятэгъэкIы. Пенсионерхэм ыкIи ветеранхэм япсауныгъэ агъэпытэным фэшI икIыгъэ илъэсым путев­кэ 95-рэ, ахэм яунагъохэм 50 аратыгъ, — къыIуагъ Николай Киселевым.
Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм ипэгъокIэу Советым хэтхэм акIуачIэ зэхэлъэу дзэкIолIхэр зыщагъэтIылъыгъэ чIыпIэхэр, саугъэтхэр ыкIи мемориалхэр агъэкъабзэх. Ветеранхэм полицием икъулыкъушIэхэр ягъусэхэу Урысые Iофтхьабзэу «ШIэжьым ичъыгхатэ», эколого-патриотическэ проектэу «Зеленая Россия» зыфиIорэм ахэлэжьагъэх. Советскэ Союзым и ЛIыхъужъэу Андыр­хъое Хъусен ыцIэ зыхьырэ республикэ фондэу «ТекIоныгъэм» ахъщэ IэпыIэгъу рагъэхьагъ.
ТигущыIэгъу къызэрэхигъэщыгъэмкIэ, ветеранхэр лъыхъон Iофтхьабзэхэм ахэлажьэх.
— Тарихъ шIэжьыр къызэтегъэнэгъэным ыкIи ныбжьыкIэхэм патриотическэ пIуныгъэ ягъэгъотыгъэным афэшI хэгъэгу кIоцI IофхэмкIэ къулыкъухэм яветеранхэм Адыгеим иветеранхэм я Совет, нэмыкI общественнэ организациехэм зэдэлэжьэныгъэ адыриI. Владимир Сахно зипэщэ Мыекъопэ лъыхъокIо отрядэу «ШIэжьым» зыцIэ амышIэрэ лIыхъужъэу Хэгъэгу зэошхом щыфэхыгъэхэр къегъотыжьых, икIэрыкIэу егъэ­тIылъыжьых, ахэм афэгъэхьыгъэ къэбарэу къаугъоижьыхэрэр еджэпIэхэм ыкIи общественнэ организациехэм ямузейхэм аIэкIагъахьэх.
Адыгэ Республикэм хэгъэгу кIоцI IофхэмкIэ и Министерствэ иветеранхэм я Совет хэтхэм псауны­гъэм зэрар езыхырэ шIыкIэхэр щыгъэзыегъэнхэм анаIэ тырагъэты, ащкIэ ныбжьыкIэхэм щысэшIу зэрафэ­хъущтхэм ыуж итых. Ащ епхыгъэу спорт ыкIи культурнэ Iофтхьабзэхэу республикэм щызэхащэхэрэм ахэлажьэх. ГущыIэм пае, Советым хэт Ирина Плетневар Урысые Iофтхьабзэу «ЩыIэныгъэм екIурэ лъэбэ­къу мини 10» зыфиIорэм хагъэунэфыкIырэ чIыпIэхэр пчъагъэрэ къыщыдихыгъ.
— ТиIофшIэнкIэ анахь дгъэфедэрэ шIыкIэхэм ащыщ кIэлэеджакIохэм зэIукIэгъухэр адэтшIынхэр. Ащ фэдэ блэгъэ зэдэгущыIэгъухэм гуфэбагъэ, псэ ахэлъ мэхъу. НыбжьыкIэхэр шъхьэихыгъэу зыфаехэм къакIэупчIэх, бзэджэшIагъэхэм, криминалистическэ техникэм афэгъэхьыгъэу къафэтIуатэхэрэр лъэшэу ашIогъэшIэгъоных. А зэпстэури хэбзэухъумэкIо системэм иапшъэрэ еджапIэхэр къыхахынхэм, полицием къулыкъу щахьыным кIэгъэгушIугъэнхэм фэIорышIэ, — хигъэунэфыкIыгъ Николай Киселевым.
ТизэдэгущыIэгъу икIэух ветеран организацием ыцIэкIэ Советым итхьаматэ игуадзэ мэфэкIыр зыфэгъэхьыгъэхэм зэкIэми къафэгушIуагъ.