МэфэкIым ипэгъокIэу хэгъэгу кIоцI IофхэмкIэ къулыкъухэм зыщахэтыгъэ илъэсхэр зыгу къэзгъэкIыжьыгъэхэм ащыщ хэбзэухъумакIохэм ятарихъ зыцIэ пытэу хэуцуагъэу, милицием иполковникэу, Дунэе полицейскэ ассоциацием и Адыгэ шъолъыр къутамэ ипрезидентэу ШъэуапцIэкъо Сэфэр. Къулыкъур зихьыгъэ илъэс 35-м фэдизыр ищыIэныгъэ иохътэ анахь дэгъоу къекIугъэхэм ар ахелъытэ.

Исэнэхьат шIу зэрилъэгъущтыгъэр, емызэщыжьэу ар зэригъэцакIэщтыгъэр къыIотэжьырэ къэбархэм дэгъоу къахэщы. Непэ Iоф зышIэрэ ныбжьыкIэхэм зафигъазэзэ ареIо:
ШъуиIофшIэн шIу шъулъэгъу, шъугу етыгъэу зэрифэшъуашэу ар жъугъэцакIэ. Тэ тилъэхъан уахътэм теплъыгъэп. Участковэу сызыщэтым, чэщым сыхьатыр тIу мыхъоу сыгъолъыжьыгъэу къэсшIэжьырэп. Ащ пае къэмынэу пчэдыжьым 8-м IофышIэм сыщыIагъ. Къэралыгъо автоинспекцием сызыщэIэми къытфагъэуцугъэ пшъэрылъыр сымыгъэцакIэу унэм сыкIожьыщтыгъэп, сыхьатыр плIы хъоу нэф къыттешъыхьэу къыхэкIыщтыгъ. Ар къыб­дэхъуным пае лъэш дэдэу уисэнэхьат шIу плъэгъун фае.
Ежь Сэфэр Щэбанэ ыкъор Тэхъутэмыкъое районэу къызщыхъугъэм къызэ­рыкIо IофышIэу лъэс-патруль къулыкъум IофшIэныр щыригъэжьэгъагъ. Нэужым подразделение зэфэшъхьафыбэмэ ащы­лэжьэнэу хъугъэ: ешъуагъэхэр зыдащэщтыгъэхэм, участковэхэм, уголовнэ-лъы­хъоным, гъогу-патруль къулыкъум, общественнэ щынэгъончъагъэр къэухъумэгъэ­ным. Тыди щытхъу хэлъэу зыкъыщигъэлъэгъон ылъэкIыгъ.
— Цыхьэ къысфашIи, сIэ къыралъхьэгъэ Iофыр зэкIэ амалэу сиIэм елъытыгъэу згъэцэкIагъэ. Ар къыздэхъунымкIэ зишIуагъэ къысэкIыщтыгъэр гулъытэ чанэу схэлъыгъэр ыкIи слъэгъугъэр зэрэсщымыгъупшэщтыгъэр ары, — еIо С. Шъэуап­цIэкъом.
БлэкIыгъэ лъэхъаным бзэджэшIагъэу зэрахьэщтыгъэхэр автомобильхэм ящэ­рэхъ­хэр, ахэт апчхэр, арыт магнитофонхэр, унагъохэм е хъызмэтшIапIэхэм ябылымхэр зэратыгъущтыгъэхэм епхыгъэх, укIын Iофхэри къыхафэщтыгъэх. Сэфэр иIофшIэгъухэр сэмэркъэухэзэ, Шерлок ХолмскIэ еджэщтыгъэх. Мэлхэр унагъо горэм шIуатыгъугъэу зы пчэдыжь горэм ащ къеупчIых: «Сыд Шерлок, мэл­хэр зытыгъугъэр къэбгъотыгъа?». Охъта­бэ темышIэу ар зышIагъэр ыгъэунэфыгъ. Чэщым машинэу блэкIыщтыгъэхэм ащыщ гуцаф фишIи лъыплъагъ, ащ ипчъэ тетыгъэ тамыгъэр ыкIи аужырэ цифрэхэу 22-р дэгъоу «ышъхьэ тыритхагъ», тыгъуа­кIохэр къычIигъэщынхэмкIэ ар икъугъ.
— Дежурствэм сыщыIэ зыхъукIэ зы чIыпIэ сисыщтыгъэп, ренэу мотоциклэм сытесэу къэсчъыхьэщтыгъ. Чэщым зекIорэ машинэхэр къэзгъэуцухэти, рулым Iусым, ащ къыдисхэм, ацIэхэр стхыщтыгъэх. БзэджэшIагъэ рахъухьагъэми, ащ къыгъэу­цущтыгъэх е нэмыкI хъугъэ-шIагъэ хъугъэми а тхыгъэхэр къысшъхьапэжьыщтыгъэх. Зэрэ къэралыгъоу щыIугъэ гухэкI къэбарэу милицием хэт нэбгыри 4-р гъогум зэрэтыраукIыхьагъэхэр ащ фэдэу къызэIутхыгъ. Мы Iофым бэ фэгъэзэгъа­гъэр: Москва лъыплъэщтыгъ, прокуратурэр, уголовнэ-лъыхъоныр. ЕплъыкIиплIэу ахэслъхьагъэхэм ащыщэу ятIонэрэр тефэгъагъ. Ащ дэжьым мы бзэджашIэхэм зэрахьэгъэ нэмыкI укIыгъэ Iофхэри къы­щы­чIэщыгъагъэх, — къеIотэжьы Шъэ­уапцIэкъо Сэфэр.
ТигущыIэгъу гукъэкIыжь дахэу иIэхэм ащыщ я 22-рэ Олимпийскэ джэгунхэу Москва щыкIуагъэхэм общественнэ рэхьатныгъэр къыщызыухъумагъэхэм зэрахэтыгъэр ыкIи ащ ипшъэрылъхэр дэгъоу зэригъэцэкIагъэхэм афэшI Олимпиадэм имедаль къыфагъэшъошагъ.
КъулыкъушIэу ущыт зыхъукIэ спортымкIэ IэпэIэсэныгъэ пхэлъын фае. Уипсауныгъэ псыхьэгъэным зыкъэухъу­мэжьынымкIэ, бзэджашIэхэм апэуцужьыгъэнымкIэ ишIуагъэ къэкIо. Сэфэр СССР-м самбэмкIэ ыкIи дзюдомкIэ спортым имастер. Милицием иеджапIэу Саратов дэтым щеджэ зэхъум ащ чIэсхэр самбэм фигъасэщтыгъэх, командэхэр зэнэкъокъу­хэм афигъэхьазырыщтыгъэх.
— ХэбзэухъумэкIо къулыкъухэм уахэты зыхъукIэ уикъарыукIи, уипытагъэкIи уакъыхэщын фае. Ухьазырыныгъэ дэгъу уиIэ зыхъукIэ чIыпIэ къиныбэхэм уакъы­рыкIын плъэкIыщт. Чэчэным сыщыIэзэ щэхэр зыухыгъэ боевикыр сымыукIэу къэсыубытын, зэкIоцIыспхэн слъэкIы­гъагъ. Ащ ыIыгъыгъэ шъэжъые гъэшIэгъонэу Америкэм къыщашIыгъэр къытесхыгъагъ, джы къызнэсыгъэми ар нэпэеплъэу сиI. Нэужым а кIалэр боевикхэм къахэкIыжьи, федеральнэ кIуачIэхэм къагохьажьи, къулыкъур Чэчэным щихьыгъ, — къы­Iуагъ полковникэу ШъэуапцIэкъом.
Чэчэным щыкIогъэ зэпэуцужьхэм ахэлажьэзэ илъэсищым ехъурэ ветераныр ащ къэтыгъ. Апэ ОМОН-м икуп икомандирэу (1996-рэ илъэсым) дзэ пшъэрылъхэр ыгъэцэкIагъэх, апэрэу зы уIагъи атемыщагъэу, чIэнагъи ямыIэу отрядым хэтхэр къыщэжьынхэ ылъэ­кIыгъ. ЯтIонэрэу 2004-рэ илъэсым командировкэ зэкIом, Шалинскэ РОВД-м общественнэ щынэгъончъэнымкIэ милицием ипащэу Iоф щишIагъ. Чэчэным итыгъэ райотдел 20-м мыр иIофшIэнкIэ ауж къинэщтыгъ, мэзищым къыкIоцI Сэфэр ащ пэрытныгъэ ригъэубытын ылъэкIыгъ.
ТигущыIэгъу илъэс пчъагъэм IофшIэнэу ышIагъэм хабзэми осэшIу къыфишIыгъ. Бгъэхалъхьэ ыкIи орден пчъагъэу иIэхэм анахь шъхьаIэу ылъытэрэр «За отвагу» зыфиIорэр ары. Джащ фэдэу Ахмат Кадыровым и Орден урысые офицерхэм ашышэу апэу зэратыгъэр ШъэуапцIэкъо Сэфэр. Мыр Чэчэн Республикэм икъэралыгъо тын анахь лъапI, Чэчэным и ЛIыхъужъхэм афагъэшъуашэ.
Хэгъэгу кIоцI IофхэмкIэ къулыкъухэм яветеран мэфэ реным удэгущыIагъэми, уемызэщынэу къэбар гъэшIэгъоныбэ къеIуатэ. Ау уахътэу тимыIэм къыхэ­кIыкIэ бэрэ тедэIунэу хъугъэп. Непэрэ мэфэ­кIымкIэ ыгу къыдеIэу иIофшIэгъугъэхэм, нахьыжъэу щысэшIу зытырахыщтыгъэхэм афэгушIо, псауныгъэ яIэу, насыпыр къя­бэкIэу, мамыр щыIакIэ яIэу псэунхэу афэлъаIо. НыбжьыкIэу езыгъэ­жьэгъа­кIэхэм гъэхъагъэхэр ашIынхэу, шъыпкъа­гъэ ахэлъэу къулыкъур ахьынэу афеIо.
Iэшъынэ Сусан.