Джыри еджапIэм чIэмыхьэгъэ кIэлэцIыкIу­хэм яжабзэ хэгъэхъогъэным фэIорышIэщт зэ­хэубытэгъэ егъэджэн- методическэ пособиеу «Адыгабзэр — синыдэлъфыбз» зыфиIорэр къыдэкIыгъ. Ар нэкIубгъо 92-рэ мэхъу.

КIэлэегъэджэ шIэныгъэхэмкIэ кандидатэу, сэнэхьат IэпэIэсэныгъэм хэгъэхъогъэнымкIэ Адыгэ республикэ институтым иIофышIэу КIэсэбэжъ Нэфсэт тхылъым дэлэжьагъ.
Илъэсрэ ныкъорэм къыщегъэжьагъэу илъэси 7-м нэс зы­ныбжь сабыйхэм яжабзэ хэгъэхъогъэнымкIэ бгъэфедэн плъэкIыщт материалхэр, гулъы­тэр къэзыгъэущырэ джэгукIэхэр ащ къыдэхьагъэх.
— Сабый цIыкIухэм яжабзэ ичаныгъэ хэгъэхъогъэным пае анахь мэхьанэшхо зиIэмэ ащыщ ныдэлъфыбзэм хэт макъэхэр къыкIэIотыкIыжьынхэр, зэхахыгъэ макъэхэр зыхэт пычыгъохэр, гущыIэхэр тэрэзэу къаIожьыныр. Ащ фэIорышIэх рубрикэ зэ­фэшъхьафхэр. ГущыIэм пае, «Дэгъоу къедэIу, зэхэпхыгъэр тэрэзэу къэIожь!», «Макъэхэр зэхэмыгъэкIуакI, тэрэзэу къэ­Iожь!» зыфиIохэрэр. Ахэр ана­хьэу адыгабзэм хэт мэкъэзещэхэм, мэкъэзэрэщэ къызэ­ры­кIохэм, мэкъэ Iужъухэм якъэ­IуакIэ нэIуасэ фэшIыгъэнхэм фытегъэпсыхьагъэх. Ахэр зэкIэ игъорыгъоу, сабый цIыкIухэм аныбжь къыдэтлъытэзэ зэхэдгъэуцуагъэх, — еIо КIэсэбэжъ Нэфсэт.
ТигущыIэгъу къызэрэтиIуа­гъэмкIэ, мэкъэпэшIыжь джэгукIэхэм ядэIунхэр ыкIи къыкIаIотыкIыжьынхэр сабый цIыкIухэм лъэшэу якIас. Макъэхэм якъэIонкIэ мэкъэпэшIыжь джэгукIэхэр лъэшэу Iэрыфэгъух.
Ежь Нэфсэт зэхигъэуцогъэ усэ цIыкIухэри тхылъым къыдэхьагъэх. Сабый цIыкIухэр адыгэ IорыIуатэхэм нахь игъэ­кIотыгъэу нэIуасэ афэшIыгъэнхэр Iофыгъошхоу щыт. Ащ фэдэх псынкIагъэ зыхэлъ джэгукIэхэр. Сабый цIыкIухэу чIым апэрэ лъэбэкъухэр щызыдзыхэрэм ящыIэныгъэ чIыпIэшхо щаубыты лъэтегъэуцо орэдхэм.

— КIэлэпIухэм, ны-тыхэр яIэпыIэгъухэу, мэкъэпэшIыжь джэгукIэхэм, адыгэ IорыIуатэхэм ядэIухэу, тэрэзэу къыкIаIотыкIыжьышъоу сабыйхэр ра­гъэсэнхэм мэхьанэшхо иI, ыкIи а Iофыгъом егъэджэн-методикэ зэхэубытэгъэ пособиер фэIорышIэ. КIэлэцIыкIухэр нахьыжъ хъухэ къэс яшIэныгъэхэми зэрахахъорэр къыдэлъытагъэу, илъэсиплIым къыщегъэжьагъэу илъэсибл зыныбжьхэм апаи гъэцэкIэнхэр дэтых. Ахэр анахьэу зыфэгъэхьыгъэхэр: мэкъэзещэхэм, мэкъэзэращэхэм, пычыгъохэм, гущыIэхэм, гущыIэухыгъэхэм якъэIон ыкIи якIэджыкIыжьын. Ахэм анэмыкIэу адыгэ IорыIуатэхэм къа­хэхыгъэхэу, кIэлэцIыкIухэмкIэ гурыIогъошIухэу джэгукIэхэр, лъытакIэхэр, гущыIэжъхэр, хырыхыхьэхэр, IурыIупчъэхэр, пшысэхэр къыдэхьагъэх, — еIо тигущыIэгъу.
Зэрэнафэу, кIэлэцIыкIухэр усэхэм къяджэнхэр лъэшэу якIас, ахэр езбырэу зэрагъэшIэным ренэу фэчэфых. Усэм гущыIэхэр епсыхьэх, кIэлэцIыкIухэм ягулъытэ егъэчаны, тэрэз къэIуакIэм фегъасэх. Жабзэм ихэгъэхъонкIэ ежь Нэфсэт пособием къыщитыгъэхэм анэмыкIэу Хьакъунэ-Хъуажъ Заре­мэ итхыгъэхэри щигъэфеда­гъэх.
— Джащ тетэу еджапIэм джы­ри чIэмыхьэгъэ кIэлэцIыкIу­хэм яжабзэ ичаныгъэ хэгъэ­хъогъэным пае анахь мэхьанэшхо зиIэмэ ащыщ зэхахырэ макъэхэр, гущыIэхэр, гущыIэзэгъусэхэр, гущыIэухыгъэхэр тэ­рэзэу къаIошъоу егъэсэгъэнхэр, гущыIэ пчъагъэу ашIэрэм хэ­гъэхъогъэныр.
НыбжьыкIэхэу зиныдэлъфыбзэ зышIэхэу, жэбзэ къабзэкIэ гущыIэхэрэр зыплъэгъухэкIэ уарэгушхо. КIэлэцIыкIу IыгъыпIэм, гурыт еджапIэм мы лъэныкъомкIэ IофшIэнышхо зэшIуа­хыми, ыпэрапшIэу ар унагъом къыщежьэн фае. КIэсэбэжъ Нэф­сэт икъорэлъфэу Хьазрэт джыри зэ ар къеушыхьаты. 2022-рэ илъэсым Дунэе зэнэ­къокъоу «ЦIыкIужъый» зыфиIо­рэм ар хэлэжьагъ. Джырэ уахъ­тэм ар Адыгэ къэралыгъо уни­верситетым социальнэ технологиехэмкIэ ыкIи зекIонымкIэ ифакультет ия 4-рэ курс щеджэ. Ащ иусэ цIыкIухэу «Тэтэжъ ыжакIэ фыжьы», «Щэмэджыр цако хъугъэ», «Кукуум иорэд», «Къандж», «Тыгъурыгъу», «Бзыущырхэр», «Къощыр цIыкIур», «Цыгъор» зыфиIохэрэр Адыгэ къэралыгъо университетым тхылъэу къыдигъэкIыщтым дэ­хьанэу къыхахыгъэх.