Социальнэ IофышIэхэм япхыгъэ сэнэхьатхэм «социальный координатор» зыфиIорэр бэмы­шIэу къахэхъуагъ. Ар ­къыхэзыхыхэрэр нахь зыфэгъэзагъэхэр хэу­шъхьафыкIыгъэ дзэ операцием хэлажьэхэрэм ыкIи иветеранхэм, ахэм яунагъохэм IэпыIэгъу ягъэгъотыгъэныр ары.

Адыгэ къэралыгъо универ­ситетым мыщ фэдэ пшъэрылъхэр зыгъэцэкIэщтхэр къычIи­гъэкIыхэу ыублэщт. Ахэм ягъэ­хьазырын фэгъэхьыгъэ Iэнэ хъурае мы ма­фэхэм зэхащагъ.
Iофтхьабзэм хэлэжьагъэхэр социальнэ IофышIэхэр гъэхьазырыгъэнымкIэ зигъо къэсыгъэ Iофыгъохэм, социальнэ координаторхэм пшъэрылъэу яIэхэм атегущыIагъэх.
Адыгэ къэралыгъо университетым социальнэ IофшIэнымкIэ ыкIи зекIонымкIэ икафедрэ ипащэу, педагогикэ шIэныгъэ­хэмкIэ докторэу Мария Паатовам къызэриIуагъэмкIэ, 2023-рэ илъэсым къыщегъэжьагъэу «Социальнэ IофышI» зыфиIорэ гъэсэныгъэ программэм дисциплинакIэхэр къыхэхьагъэх, ахэр анахьэу социальнэ IофшIэным ыкIи социальнэ координаторхэм япхыгъэх, нэужым «Хэгъэгум иухъумакIо­хэр» зыфиIорэ фондым ахэр иIофышIэ хъунхэ алъэкIыщт.
ИлъэсыкIэ еджэгъум къыщегъэжьагъэу ящэнэрэ курсым ис студент 17-мэ хэушъхьафы­кIыгъэ еджэныр аублэщт, программэм къыдыхэлъытагъэу социальнэ координаторым иIоф­шIэн зэрэзэхищэн фаер, пшъэ­рылъэу иIэхэр арагъэшIэщтых, технологиеу «Iушы» зыфиIорэм щагъэгъозэщтых. Ащ къыделъытэ чIыпIэ къин ифэгъэ цIыфым ыкIи иIахьылхэм IэпыIэгъу афэ­хъугъэныр, хэушъхьафыкIыгъэ дзэ операцием иветеранхэм, ащ хэкIодагъэхэм яунагъохэм якъин адагощыныр.

— Социальнэ координаторым цIыфым ищыкIэгъэ Iэпы­Iэгъур ригъэкIышъун фае, сыд фэдэ ошIэ-дэмышIэ Iоф къэхъу­гъэми, ар зэшIуихын ылъэкIын, пшъэдэкIыжь зэриIэр къыгурыIон, купым хэтэу Iоф ышIэшъун фае. Джащ фэдэу ахэм къэралыгъом IэпыIэгъоу аригъэ­кIырэр ашIэн, психологическэ IэпыIэгъу арагъэгъотын амал яIэн, лъэныкъо зэфэшъхьафхэмкIэ чанхэу, цIыфышIухэу щытынхэ фае. Мы лъэныкъомкIэ шIэныгъэ куу зиIэ специалистхэр дгъэхьазырынхэр ары пшъэрылъ шъхьаIэу тиIэр, — къыIуагъ Мария Паатовам.
Iофтхьабзэм къыдыхэлъы­тагъэу хэушъхьафыкIыгъэ дзэ операцием хэлажьэхэрэм Iэпы­Iэгъу ягъэгъотыгъэнымкIэ фондэу «Хэгъэгум иухъумакIо­хэр» зыфиIорэм ипащэ игуадзэу НэмытIэкъо Юныс яIофшIэн зэ­рэзэхащэрэр къыIотагъ. 2023-рэ илъэсым къыщегъэжьагъэу фондыр Адыгеим къыщызэIуа­хыгъ ыкIи джырэкIэ ащ епхыгъэ социальнэ координаторхэр рес­публикэм имуниципалитетхэм ащыIэх.
Адыгэ къэралыгъо университетым истудентхэу хэушъхьафыкIыгъэ егъэджэнхэр зыкIущтхэм нэужым фондым практикэ щахьынэу агъэнафэ.