Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ Урысыем и МВД икъутамэ Красногвардейскэ районымкIэ иотделрэ яIофышIэхэр илъэс 29-рэ зыныбжь хъулъфыгъэу а районым щыпсэурэм егуцафэх шхъухьэ зэрихьагъэкIэ.

ЗэрагъэунэфыгъэмкIэ, 2022-рэ илъэсым унэе предпринимательствэм пыхьанэу хъулъфыгъэм ыгу къэ­кIыгъ. УрыпсэунымкIэ анахь ахъщэ макIэу агъэнэфагъэм нахь макIэу уихахъохэр щытхэмэ, субсидие къыуатыщт унэе Iоф горэ къызэIупхынэу уфаемэ. ИIофхэм язытет шъыпкъэ ащ ыушъэфи, къэбар нэпцI­хэр зэрыт документхэр аIэкIигъэхьагъэх ыкIи сомэ мин 350-рэ къыратыгъ.
ХэбзэухъумэкIо къулыкъухэм яIофышIэхэм предприниматель нэпцIым зэхилъэшъогъэ Iофыр къычIагъэщыгъ. УплъэкIунэу ашIыгъэм къыгъэлъэгъуагъэхэм атетэу Урысые Федерацием и Уголовнэ кодекс ия 159.2-рэ статья ия 3-рэ Iахь тегъэпсыхьагъэу уголовнэ Iоф къыфызэIуахыгъ. Илъэси 6 хьапс ащ тыралъхьан алъэкIыщт.