ФутболымкIэ Урысыем изэнэкъокъу иятIонэрэ лигэ икупэу «Б-м» хэт «Зэкъошныгъэр» мы мафэхэм командэу «Спартак-Налщык» де­шIагъ, Мыекъуапэ щыкIогъэ зэIукIэгъур 1:2-у хьакIэхэм ахьыгъ.

«Зэкъошныгъ» — «Спартак-Налщык» — 1:2 (0:2).
Къэлапчъэм Iэгуаор дэзы­дзагъэхэр: Хизриевыр — 0:1, Мусаевыр — 0:2, Зезэрахьэр — 1:2.
«Зэкъошныгъэм» щешIагъэх:
Хачировыр, Черджиевыр, Га­джимагомедовыр, Мохбалиевыр (Зезэрахьэр), Магомедбековыр, Юшко (Цанава), Коблыр, Сергеевыр (Малкандуевыр), Кравчен­кэр (Антоненкэр), Делэкъор (Ра­­гулькиныр), Абдуллаевыр.
Тренер шъхьаIэр: С. Мирошниченкэр.
«Спартак-Налщык» хэтыгъэх:
Къумыкъур, Хизриевыр (Князевыр), Къэрданыр, Чичба (Черкесыр), КIэдэкIоир, Гъогужъэкъор, Блиевыр, Дени, Хачировыр, Лы­сенкэр (Тлуповыр), Мусаевыр (Машуковыр).
Тренер шъхьаIэр: Т. Бито­ковыр.

Мы зэIукIэгъум «Зэкъошны­гъэм» текIоныгъэр къыщыдихыным бэхэр ежагъэх. Тикомандэ ешIэгъуи 4-у иIагъэм зы очко ныIэп къащихьыгъэр. Апэрэ таймым иапэрэ такъикъи 10 тифутболистхэр дэгъоу джэгугъэх, хьакIэхэм зи къадагъэхъугъэп. Къэлапчъэм Iэгуаор дадзэнымкIэ амалышIухэр яIагъэх, ау афызэшIокIыгъэп. Ащ ыуж «Спартак-­Налщыкым» иешIакIэ ригъэ­хъугъ. Джабгъу лъэныкъор ары гумэкIыгъо къыздикIыгъэр. Гамзат Хизриевыр ыпэкIэ илъыгъ, ащ Денис Кравченкэр кIэхьашъугъэп, къэлэпчъэIутэу Тамирлан Хичировым Iэгуаор къыубытын ылъэкIыгъэп, пчъагъэр — 0:1. ХьакIэхэр ащ къыщыуцугъэхэп, Магомед Мусаевыр къэлапчъэм метри 6-кIэ пэчыжьэу дэуагъ ыкIи пчъагъэм хигъэхъуагъ — 0:2.
«Зэкъошныгъэм» я 83-рэ та­къикъыр ары къэлапчъэм Iэгуаор зыдидзагъэр. Къахэщыгъэр Зе­зэрэхьэ Артур. Ау нэужым пчъа­гъэр зэблэхъугъэп, хьакIэхэм оч­коуи 3 къахьыгъ.
— Апэрэ таймым дэй дэдэу тешIагъ. Мы ешIэгъур зэрэтшIуа­хьыгъэр сэ силажь. КIалэхэр икъу фэдизэу зэIукIэгъум фэзгъэхьазырыгъэхэп. Ау техническэу е тактическэу ешIэгъур мыхъурэми, футболистхэм сыдигъуи гуетныгъэ къызхагъэфэн фае. Ар апэрэ едзыгъом слъэгъугъэп. ЯтIонэрэ таймым тIэкIу нахь дэгъоу ты­джэгугъ, ау ар тфикъугъэп, — къыIуагъ зэфэхьысыжьхэр къы­шIызэ «Зэкъошныгъэм» итренер шъхьаIэу Сергей Мирошниченкэм.
Я 5-рэ турым изэфэхьысыжьхэр:
«Зэкъошныгъ» — «Спартак-Налщык» — 1:2, «Динамо Ставрополь» — «Рубин Ялта» — 1:1, «Динамо-2» — «Астрахань» — 0:7, «Победа» — «Ангушт» — 2:0, «Ростов-2» — «Кубань Холдинг» — 1:1, «Нарт» — «Легион» — 1:1, «Севастополь» — «Шъачэ-2» — 1:4.
«Зэкъошныгъэр» я 13-рэ чIыпIэм щыт, къыкIэлъыкIощт ешIэгъур мэлылъфэгъум и 19-м иIэщт, Махачкала икомандэу «Легионым» IукIэщт.
Командэхэр зыдэщыт чIыпIэхэр ыкIи очко ­пчъагъэу рагъэкъугъэр:

1. «Ростов-2» — 11.
2. «Шъачэ-2» — 11.
3. «Легион» — 10.
4. «Севастополь» — 10.
5. «Кубань Холдинг» — 9.
6. «Рубин Ялта» — 8.
7. «Динамо Ставрополь» — 8.
8. «Победа» — 7.
9. «Спартак-Налщык» — 7.
10. «Астрахань» — 5.
11. «Нарт» — 5.
12. «Ангушт» — 3.
13. «Зэкъошныгъ» — 1.
14. «Динамо-2» — 0.