Гъэтхэ дзэ дэщыгъом къыдыхэлъытагъэу Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм яапэрэ куп мэлылъфэгъум и 15-м гъогу техьагъ.

КъулыкъушIэ нэбгыри 10-р мэфэкI шIыкIэм тетэу агъэкIотагъэх. Ахэм гвардейскэ хэушъхьафыкIыгъэ мотострелковэ бригадэу «Горная» зыфиIоу Къэрэщэе-Щэрджэс Республикэм итым къулыкъур щахьыщт.
АР-м идзэ комиссариат щыкIогъэ Iофтхьабзэм хэлэжьагъэх АР-м и ЛIышъхьэ ихэушъхьафыкIыгъэ программэхэмкIэ ГъэIорышIапIэм ипащэ игуадзэу Сергей Кривошей, Къыблэ дзэ округым изэхэт стратегическэ командование иинспектор куп хэтэу, генерал-майорэу Юрий Калягиныр, Мыекъопэ къэлэ администрацием ипащэ игуадзэу, ветеранхэм якъэлэ Совет итхьаматэу Юрий Томчак, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
Къэзэрэугъоигъэхэм шIуфэс гущыIэ­хэмкIэ закъыфигъэзагъ АР-м идзэ комиссар ипащэ тылымкIэ игуадзэу Сергей Сергеевым.
— УФ-м и УIэшыгъэ КIуачIэхэм дзэ къулыкъур ащышъухьынэу ешъогъажьэ. Непэ къыщыублагъэу джы Хэгъэгум шъуриухъумакIу. Хэгъэгум иухъумакIо и Илъэсэу агъэнэфагъэм ар зэрэтефагъэм шъурыгушхонэу ыкIи къэжъугъэшъыпкъэжьынэу щыт. Щытхъу хэлъэу къулыкъур къэшъухьыным ищыкIэгъэ кIуа­чIэ, гушхоныгъэ ин зэрэшъухэ­лъым сицыхьэ телъ, — къыIуагъ Сергей Сергеевым.
Генерал-майорэу Юрий Калягиным ныбжьыкIэхэм закъыфигъэзагъ. Хэгъэгум ыпашъхьэ пшъэдэкIыжьэу щахьырэр агъэцэкIэным игъо къызэрэсыгъэр ащ хигъэунэфыкIыгъ. Хъулъфыгъэм ишэн- зекIуакIэхэр дзэ къулыкъум псыхьагъэ зэрэщыхъухэрэр, мы мафэм къыщегъэ­жьагъэу ахэр зэрэдзэкIолIхэр къагурыIозэ, щытхъу хэлъэу япшъэрылъхэр зэшIуахынхэ зэрэфаер агуригъэIуагъ.
Якомандирхэм ядэIунхэу, зыфэсакъы­жьынхэу, зэрэдэкIыгъэхэм фэдэу япсауныгъэ зэщымыкъоу ны-тыхэм къафагъэзэжьынхэу къафэлъэIуагъ. Джащ фэ­дэу мы къулыкъушIэхэр зэпэуцужьхэр зыщыкIорэ чIыпIэхэм зэрамыщэщтхэр къыхигъэщыгъ.
АР-м и ЛIышъхьэу КъумпIыл Мурат ыцIэкIэ шIуфэс къарихыгъ ыкIи гъогу техьэхэрэм къафэгушIуагъ Сергей Кривошей.
— Сыд фэдэрэ лъэхъани дзэм къулыкъу щыхьыгъэныр хъулъфыгъэ пэпчъ ипшъэрылъ шъхьа­Iэу щыт. Тятэжъ пIашъэхэм къащегъэжьагъэу непэ къызнэ­сы­­­гъэм тицIыфхэм дзэ пшъэ­ры­лыр сыдигъокIи щытхъу хэ­лъэу агъэцакIэ, къэралыгъор къау­хъумэ. Илъэс 80-кIэ узэкIэIэбэ­жьы­мэ ТекIоныгъэшхоу къыдахыгъэр зыщыдгъэгъупшэ хъущтэп. ЩысэшIоу щыт непэ хэушъхьафыкIыгъэ дзэ операцием ти­дзэкIолIхэм япшъэрылъхэр щытхъу хэлъэу зэрагъэцакIэрэр. Шъуп­саоу, шъуузынчъэу къэжъугъэзэжьынышъ, унэгъо дахэхэр зэрэшъушIэщтхэм, Адыгеим ибаиныгъэ зэрэхэжъу­гъэхъощтым сицыхьэ телъ, — хигъэунэфыкIыгъ Сергей Кривошей.
ГущыIэр лъигъэкIотагъ Юрий Томчак. Дзэм къулыкъу щызыхьынэу ежьэгъэ кIэлакIэхэм ашIыгъэ лъэбэкъур щытхъу­гъэу афэплъэгъунэу зэрэщытыр ащ къыIуагъ. УIэшыгъэ КIуачIэхэм къулыкъур ащыхьыгъэныр, Хэгъэгум ишъхьафитныгъэ къэухъумэгъэныр хъулъфыгъэ, гражданин ыкIи патриот пэпчъ ипшъэ­рылъ шъхьаI. Гъогу мыпсынкIэу къакIущтым яшэн-зекIуакIэхэр нахь зэрипсыхьащтыр, пытагъэ зэрахилъхьащтыр ащ къыхигъэщыгъ.
— Тикъэралыгъо игъунапкъэхэм ащыщхэм зэпэуцужьхэр зэращыкIохэрэм пстэуми тыщыгъуаз, ау ахэм афэдэ чIыпIэхэм шъо шъуащэщтэп. Илъэсыр кIоу, дзэ техникэр, Iашэр зэрэбгъэфедэщтхэр икъоу къызIэкIэжъугъа­хьэхэу, шъо игъоу шъулъытэмэ, зэзэгъыныгъэкIэ къулыкъу шъу­хьыныр къыхэшъухын шъу­лъэкIыщт. Непэ къышъуфэгумэкIыхэрэ ны-тыхэр зыщышъумыгъэгъупшэх, зэпхыныгъэ адэшъу­Iыгъ, — къыIуагъ Ю. Томчак.
МэфэкI Iофтхьабзэр концерт программэкIэ зэфашIыжьыгъ. Ащ ыуж къэзэрэугъоигъэхэр щагум дэхьагъэх, ныбжьыкIэу гъогу техьагъэхэр агъэкIотагъэх.
Iэшъынэ Сусан.
Сурэтыр: Iэшъынэ Аслъан.