Адыгеим и Урыс географическэ обществэ иныбжьыкIэ Гупчэ Адыгэ къэралыгъо университетыр игъусэу мы мафэхэм интеллектуальнэ джэгукIэу «Гефест VII» зыфиIорэр зэхащагъ. Ар Урысыем ичIыпIэ 20-мэ ащыкIуагъ.

Илъэс 16-м къыщегъэжьагъэу 25-м нэс зыныбжьыхэр ащ хэлэжьагъэх, нахьыжъхэми ащ фэдэ амал яIагъ, ау ахэм баллхэр афагъэуцугъэхэп. Адыгеим истудентхэм анэмыкIэу Краснодар краим къикIыгъэхэри Iофтхьабзэм къырагъэблэгъагъэх, географиемкIэ шIэныгъэу аIэкIэлъыр къагъэлъэгъуагъ.
«Гефест VII» зыфиIорэ фестивалыр ятIонэрэу Адыгеим щэкIо, Урысыем и Къыблэ пштэмэ, тиреспубликэ закъу мы Iофтхьабзэр зыщызэхащэрэр. ГеографиемкIэ ныбжьыкIэхэм яшIэныгъэхэр ауплъэкIунхэр ыкIи ахагъэхъоныр ары фестивалым ипшъэрылъ шъхьаIэр. ЦIыфым ищыIэныгъэкIэ географием епхыгъэ шIэныгъэхэр къыфэфедэх, гущыIэм пае, мэзым ухэгъощыхьагъэмэ, укъызэрэхэ­кIыжьыщтыр, пхъэцыр (мох) къызытекIэрэр зэрэтемыр лъэныкъор ыкIи нэмыкIхэр мы предметым уегъашIэ.
ДжэгукIэр щэу гощыгъэу кIуагъэ, географием епхыгъэ упчIэхэр къаты­гъэх. Апэрэм мультфильмэ зэфэшъхьафхэр зыщытырахыгъэ чIыпIэхэр ныбжьыкIэхэм къашIэн фэягъ. ЯтIонэрэм буквэхэр зэхагъэуцуагъэх, географием епхыгъэ упчIэхэм яджэуапхэр къаратыжьыгъ. Москва къэралыгъо университетым истудент упчIэхэр зэхэзыгъэуцуагъэхэр.
Фестивалым зеушъомбгъу, гъэрекIо купи 8-мэ хэлэжьагъэр, мыгъэ нэбгырэ 60 къекIолIагъ, ахэр куп 13-у зэтеутыгъа­гъэх. Студентхэр зыфеджэхэрэ сэнэхьатым емылъытыгъэу, шIэныгъэ куу къагъэлъэгъуагъ, анахь дэгъухэм шIухьафтынхэр аратыгъэх.
ДЕЛЭКЪО Анет.
Сурэтыр: Iэшъынэ Аслъан.