Космонавтикэм и Мафэ фэгъэхьыгъэ Iофтхьабзэу «Пчъэ зэIухыгъэхэм я Мафэ» Урысыем и ДОСААФ и Мыекъопэ авиационнэ клуб ригъэкIокIыгъ. Ар Мыекъопэ къэралыгъо технологическэ университетым и Дзэ егъэджэн гупчэ щыкIуагъ.

Ащ къырагъэблэгъагъэх АР-м иветеранхэм я Совет илIыкIоу Р. Шэуджэныр, Мыекъопэ авиаполкым иветеранхэм я Совет итхьаматэу В. Мартыновыр, офицерхэм ягарнизон Унэ ипащэу Р. Шабалиныр, аэроклубым иветеранхэм я Совет итхьаматэ икIалэу В. Шапошниковыр. Джащ фэдэу социальнэ куп зэфэшъхьафхэм ащыщ кIэлэеджэкIо ыкIи ныбжьыкIэ 250-рэ фэдиз мы Iофтхьабзэм зэрипхыгъ.
Къэзэрэугъоигъэхэм шIуфэс гущыIэхэмкIэ закъыфигъэзагъ Мыекъопэ авиационнэ-спорт клубым ипащэу Евгений Антошкиным. КъыткIэхъухьэ­рэ ныбжьыкIэхэм инженер-техническэ шIэныгъэу яIэхэм заушъомбгъуным мэхьанэ зэриIэр ащ хигъэу­нэфыкIыгъ.
Мэлылъфэгъум и 12 мафэр космосыр зэгъэшIэгъэным итамыгъэу зэрэщытым имызакъоу, наукэм ыкIи технологиякIэхэм ныбжьыкIэхэр афэщэгъэнхэмкIэ зэрэамалышIур къыхигъэщыгъ.
— Тинепэрэ Iофтхьабзэ грант проектэу «Нэбгырэ пэпчъ итарихъ мэхьанэ Хэгъэгум ыпа­шъхьэ щыриIэ гъэхъагъэхэмкIэ ашы, ау цIыфым ишIуагъэ зэрашырэр — ипатриотизмэ ыкIуачI» зыфиIорэм къыдыхэ­лъытагъэу зэхэтщагъ. Мыщ ипшъэрылъыр быбын IофымкIэ ухьазырыныгъэ ягъэгъотыгъэныр, цIыф зэрымыс быбырэ пкъы­гъохэр (дронхэр) зэрагъэIорышIэщтхэр ягъэшIэгъэныр, Хэгъэгум шъхьэкIэфэныгъэу фыряIэр, патриотизмэм ыкIуачIэ гъэпытэгъэнхэр ары, — къы­Iуагъ Евгений Антошкиным.

Гъэсэныгъэ организациехэм ащеджэ­хэрэр, зипсауныгъэ амалхэр зэщыкъогъэ Iэтахъохэм ащыщхэр, щыIэныгъэм чIыпIэ зэжъу ригъэуцогъэ унагъохэм, Ук­раинэм къикIыжьын фае хъугъэхэм, хэушъхьафыкIыгъэ дзэ операцием хэлажьэхэрэм якIэлэцIыкIухэр Iофтхьабзэм къыращэлIагъэх. Къэзыбыбыхьэрэ пкъы­гъо зэфэшъхьафхэм ятехническэ зытет къафаIотагъ, ахэр ыкIи нэмыкIхэр нэры­лъэгъу афашIыгъэх. Анахьэу ашIогъэшIэгъон хъугъэр мотопарапланыр (парамотор) къызэребыбэкIырэр ары.
ЩыIэныгъэм авиациер къыщыхэхыгъэ­нымкIэ, я Хэгъэгу шIу алъэгъоу, патриотизмэр ахэлъэу ныбжьыкIэхэр пIугъэн­хэмкIэ мыщ фэдэ Iофтхьабзэхэр амалышIух.
Iэшъынэ Сусан.
Сурэтхэр: Мыекъопэ аэроклубыр.