2024-рэ илъэсым ищылэ мазэ къыщыублагъэу Мыекъопэ къэралыгъо технологическэ университетым проектэу «Школа K’Star kIds» зыфиIорэм щыдэлажьэх.

Университетым идоцентэу КIэдэкIое Нэфсэт зипэщэ кIэлэ­цIыкIу купым адыгэ дышъэ блэрым ыкIи тхыпхъэхэм яхэдыкIын аIэ къырагъахьэ.
Сэнэхьатэу къыхахы ашIоигъор нахьыжьэу аIэ къырагъэ­хьан амал аратыныр, нахь къы­зэрыкIоу щыт къулаиныгъэ­хэр игъорыгъозэ ныбжьыкIэхэм къызIэкIагъэхьанхэр ары зэхэщакIохэм пшъэрылъэу зыфа­гъэуцужьырэр. Ахэм адакIоу худо­жественнэ гъэхъагъэу лъэп­къым иIэр ягъэшIэгъэныр, ащ уасэ фашIыным, агъэлъэпIэным ахэр фапIух.
Илъэси 7 — 12 зыныбжьыхэм апае программэм лъэныкъо зэ­фэ­шъхьафхэр къыдыхэлъыта­гъэх.
Апэрэр — сценэм узэрэтетыщтыр, узэрэщызекIощтыр, щы­гъыныр къызэрыбгъэлъэгъощтыр, пкъыр зэрэпIыгъыщтыр.

ЯтIонэрэр — шъуашэм теплъэу иIэщтым изэгъэшIэн дэлэжьэгъэныр. Блэрыр, шъагъэр, дышъэидэр, щылэ Iуданэр бгъэфедэхэзэ щыгъыныр зэрэбгъэпсыщтыр.
Ящэнэрэ лъэныкъор — дэн-бзэн Iофым нэIуасэ фэшIы­гъэнхэр. Зэрыдэхэрэ машинэ зэ­фэшъхьафхэр аIэ къырагъэ­хьанхэм дэлэжьэгъэныр. Iэлъмэкъхэр, нэгъунджалъэхэр, жьыфхэр, IэплъэкIыжъыехэр хадыкIынхэм фэгъэсэгъэнхэр.
Илъэс 13 — 17 зыныбжь пшъэшъэжъыехэм теориер ыкIи щыгъыныр зыхашIыкIыщтым Iоф дэшIэгъэным фэгъэсэгъэнхэр программэм къыдыхэлъытагъ. Ежь аIэкIэ пкъыгъо къызэрыкIохэр агъэхьазырышъунхэм, уахътэм диштэу щыгъыныр гъэпсыгъэным ахэр фагъэхьазырых.
2024-рэ илъэсым еджэкIо нэбгырэ 12-мэ курсхэр къызэраухыгъэмкIэ сертификатхэр аратыгъэх. 2025-рэ илъэсым нэбгырэ 36-рэ рагъаджэ.
КIэдэкIое Нэфсэт 2024-рэ илъэсым Дунэе форумэу «Содружество моды» зыфиIоу Санкт-Петербург щызэхащагъэм рагъэблэгъэгъагъ. Мыекъопэ къэ­ралыгъо технологическэ университетым Iофэу щагъэца­кIэрэр иIэубытыпIэу докладэу «Сэнэхьатым икъыхэхынкIэ зи­­гъо шIыкIэ амалхэр» зыфи­Iорэр ащ къыщишIыгъ.
— Непэрэ егъэджэн сыхьатхэр гъэшIэгъонэу зэхэтщагъ. Нахьыжъхэр зыхэхьэрэ купым кIэпхыным ибзыкIэ-дыкIэ щызэхэтфыгъ. Дышъэ ыкIи тыжьын хэдыкIыным, лъэпкъ Iэпэщысэхэр шIыгъэнхэм ахэлажьэ зы­шIоигъомэ япчъагъэ зэрэха­хъорэм тегъэгушIо. НахьыкIэхэм бзыхьафым мастэкIэ хэдыкIы­гъэныр ятэгъашIэ. Ащ дакIоу дышъэ блэныр, шъагъэм иIушIыкIын, дышъэ идагъэр зэтэгъашIэ. ХэдыкIыным ишъэфхэр къыткIэхъухьэрэ лIэужхэм ядгъэшIэным тыпылъ. Культурнэ кIэным уасэ фашIынымкIэ егъэджэн десэхэм мэхьанэшхо яIэу сэлъытэ. Адыгэ лъэпкъ Iэпэщысэхэм якъэухъумэн ыкIи яхэгъэ­хъон егъэджэнхэр тегъэпсыхьагъэх, — къыIуагъ КIэдэкIое Нэфсэт.
Агу етыгъъэу адыгэ пшъэ­шъэ­жъыехэм мастэр, Iуданэр зэ­рагъэIорышIэрэм уегъэгушхо.
— Сэ илъэс 16 сыныбжь, дизайнер сыхъунэу сыфай. Мы курсым ишIогъэшхо къысэкIы. Дэным, бзэным, хэдыкIыным, хэхъыкIыным ишъэфхэр тагъа­шIэ. Сянэжъ хэдыкIыным иамал­хэр тIэкIу сигъэшIагъ, ар сшIомакIэу еджэныр мыщ щылъы­сэгъэкIуатэ, — къыIуагъ Агъыр­жьэнэкъо Камиллэ.
АР-м ибзылъфыгъэхэм я Союз хэтэу, Сирием къикIы­жьыгъэ Хьапэпх Сэлам курсхэр шIогъэшIэгъонхэу къэкIо. Бзылъфыгъэ ныбжьыкIэр «ыIэ ды­шъэр пэзы» зыфаIорэм фэд: мадэ, махъэ, хедыкIы, IуешIыкIы, иIэ­пэIэсэныгъэкIэ ныбжьыкIэхэм адэгуащэ.
— СицIыкIугъом къыщыублагъэу сянэжъи сяни дышъэидэныр сагъэшIагъ. ИжъыкIэ адыгэ пшъашъэхэр ащ фэIэпэIэсэнхэу зэрыщытыгъэр къызгура­гъэIуагъ, Iэпэщысэхэр зэкIужьэу згъэпсынхэм сыфагъэсагъ, джы лIэужыкIэм сыдэгощэнэу исхъу­хьагъ, — къыIуагъ Хьапэпх Сэлам.
— Адыгэмэ ядышъэ кIэн къэухъумэгъэным, лъэпкъ зэфэшъхьафхэм ар ядгъэшIэным тызэрэхэлажьэрэм гушхуагъэ къытхелъхьэ. НыбжьыкIэхэм ялъэпкъ культурэ зэрэбаим, зэрэдахэм ащыгъозэнхэмкIэ мы Iофтхьабзэм ишIогъэшхо къэ­кIощт. Лъэпкъ Iэпэщысэр ­псэущт итарихъ изэгъэшIэн лIэужхэр хэщагъэхэ хъумэ, — хигъэунэфыкIыгъ КIэдэкIое Нэфсэт.
Лъэпкъ IэпэIасэхэм яхудо­жественнэ IофшIагъэхэр ныбжьыкIэхэм алъыгъэIэсыгъэн­хэмкIэ хэдыкIыным пыщэгъэ КIэ­дэкIое Нэфсэт проектым къыдыхэ­лъытэгъэ егъэджэнхэр лъи­гъэкIотэщтых.
Лъэпшъыкъо Фатим.
Сурэтхэр авторым иех.